Jámiyette tınıshlıq hám qáwipsizlikti támiyinlew – hár bir puqaranıń turmısında úlken áhmiyetke iye. Sonlıqtan, búgingi kúnde máhállelerde jınayatshılıqtı azaytıw hám onıń aldın alıw máselesi mámleketlik siyasat dárejesine kóterilgen.

Ózbekstan Respublikası Prezidentiniń qararı tiykarında máhállelerdegi kriminogen jaǵdaydı jaqsılaw hám huqıqbuzarlıqlardıń aldın alıw maqsetinde Ámiwdárya rayonında keń kólemli baslamalar ámelge asırılmaqta.
Usı maqsette rayon hákimi S.Xwjametovtıń basshılıǵında xalıq penen ashıqtan-ashıq sóylesiwler shólkemlestirilmekte. Bunday ushırasıwlar rayonnıń “Bosuv,” “Doslıq,” “CHordara” hám “Durunki” máhállelerinde bolıp ótti. Olarda rayon hákimi, onıń orınbasarları, tiyisli shólkemler hám uyımlardıń wákilleri, máhálle belsendileri hám puqaralar belsene qatnastı.
Ushırasıwlar dawamında hákim xalıq penen ashıqtan-ashıq sóylesip, jınayatshılıqtıń aldın alıw tek ǵana mámleketlik uyımlar emes, al hár bir puqaranıń da juwapkershiliginde ekenin atap ótti. Máhálle – ulıwma úyimiz, onı tınısh hám qáwipsiz saqlaw bolsa hámmemizge birdey tiyisli wazıypa ekeni ayrıqsha atap ótildi.
Ilajlarda jámiyetlik tártipti saqlaw, jaslar arasında túsinik jumısların kúsheytiw, jumıssızlıqqa qarsı gúresiw, xalıqtıń mashqalaların úyreniw hám olarǵa ornında sheshim tabıw sıyaqlı áhmiyetli máseleler dodalandı.
Puqaralar tárepinen kóterilgen máseleler hákim hám juwapker basshılar tárepinen tıńlanıp, bir qatar mashqalalar boyınsha anıq ilajlar belgilep alındı. Bunday ashıqtan-ashıq sóylesiwler rayonnıń barlıq máhállelerin qamtıp alǵan halda basqıshpa-basqısh dawam ettirilmekte.

Qaraqalpaqstan xabar agentligi