Elimizde isbilermenlik subektlerin hár tárepleme qollap-quwatlaw, sonıń ishinde, korporativlik qatnasıqlardı rawajlandırıw baǵdarında izbe-iz reformalar ámelge asırılmaqta.

Juwapkershiligi sheklengen jámiyetlerdiń jumısın tártipke salatuǵın normalardı sistemalastırıw hám birdey etiw jáne unamlı sırt el tájiriybesinen kelip shıǵıp, olardı tolıqtırıw zárúrligi bar ekenligi sebepli “Juwapkershiligi sheklengen jámiyetler haqqında”ǵı nızam islep shıǵıldı.
Senattıń jalpı májilisinde dodalanǵan nızamda jámiyettiń filialları hám wákilxanaları, filial hám ǵárezli xojalıq jámiyetlerin ashıw tártibi, jámiyet qatnasıwshıları arasındaǵı kelispewshilikli jaǵdaydı sheshiw jáne jámiyet ulıwma májilisi protokolınıń nusqaların qatnasıwshılarǵa jetkeriw máseleleri óz kórinisin tapqan.
Bunnan tısqarı, jámiyettiń baqlaw keńesi aǵzaların saylaw tártibi hám jámiyettiń jeke basshılıq tiykarındaǵı atqarıw uyımı (direktor)nıń hám kollegial atqarıw uyımlarınıń minnetlemeleri de názerde tutılmaqta.
Nızam menen jámiyet tek ǵana licenziya emes, al ruqsat etiw xarakterine iye hújjetler tiykarında yamasa xabardar etiw tártibinde belgili bir jumıs túrleri menen shuǵıllanıwı múmkin ekenligi belgilenbekte. Jámiyet qatnasıwshılarına ózleriniń korporativ huqıqların ámelge asırıw haqqında korporativ shártnamalar dúziw sıyaqlı bir qatar huqıqlar beriliwi názerde tutılmaqta.
Bunnan tısqarı, jámiyet baqlaw keńesiniń qararların sırttan dawıs beriw hám baqlaw keńesi aǵzaların saylaw tártibi, baqlaw keńesiniń wákillikleri jáne azshılıq qatnasıwshılar komitetin shólkemlestiriwge baylanıslı qaǵıyda bekkemlenbekte.
Májiliste juwapkershiligi sheklengen jámiyetlerdiń jumısına zamanagóy korporativlik basqarıw sistemasın engiziw, olardıń jumısın tártipke salatuǵın nızam hújjetlerindegi huqıqıy boslıqlardı saplastırıw hám jámiyet qatnasıwshılarınıń huqıqları menen nızamlı máplerin qorǵaw máselelerine de ayrıqsha itibar qaratıldı.
Senatorlar maqullaǵan nızam jámiyet qatnasıwshılarınıń huqıqları menen nızamlı mápleriniń kepilliklerin bunnan bılay da bekkemlew, olardıń úlesleri aldaw hám aldawshılıq jolı menen ózlestiriliwine jol qoymaw ushın huqıqıy tiykar bolıp xızmet etedi.

N.Abduraimova,
N.Haydarov (súwret),
ÓzA