Mámleketimizde jas áwladtı milliy hám ulıwmainsanıylıq qádiriyatlar, watansúyiwshilik ruwxında tárbiyalaw, olardıń jámiyette múnásip orın iyelewi, abadan turmıs keshiriwi ushın sharayat jaratıw jolında salmaqlı jumıslar ámelge asırılmaqta.

Atap aytqanda, elimiz rawajlanıp atırǵan bir waqıtta shetki aymaqlarda da zamanagóy, qolaylı hám jaslar ushın imkaniyatlarǵa bay orınlar qurılmaqta.
Sonıń ishinde, Qaraqalpaqstan Respublikası Nókis qalasınıń Xalıqlar doslıǵı máhállesinde zamanagóy normalar tiykarında qurıp pitkerilgen Jaslar orayı paydalanıwǵa tapsırıldı.
Orayda shet tillerin úyreniw, kompyuter sawatlılıǵı, mental arifmetika, súwretlew kórkem óneri, tigiwshilik, toqıwshılıq, milliy ónermentshilik sıyaqlı kásip-óner dógerekleri shólkemlestirilgen.
Sonday-aq, “Book cafe”, “Zakovat” klubı, shashka hám shaxmat dógerekleri, IT hám robototexnika sabaqları, inklyuziv kásiplik bilimlendiriw dógerekleri hám kovorking orayı jumıs alıp baradı.
Juwapkerlerdiń atap ótiwinshe, bul oray jaslardıń baslama hám ideyaların birlestiriw, jańa joybarlar tayarlaw, jigit-qızlardı isbilermenlikke úyretiw, óz-ara dodalawlar maydanın jaratıw, hár qıylı tarawlarda sheberlik sabaqların ótkeriw ushın súyikli orınǵa aylanadı.

Gulnoza Boboeva,
ÓzA