Gúrish dúnya boylap eń kóp paydalanılatuǵın ónim sıpatında tán alınǵan. Bul ónimniń quramı hár qıylı paydalı zatlarǵa bay. Gúrish quramındaǵı kaliy awqat penen birge túsken duzdıń zıyanlı tásirin azaytadı, júrek-qan tamır sistemasın jaqsılaydı hám nerv sistemasın tınıshlandıradı. Bunnan tısqarı, onda súyeklerdiń bekkemligin támiyinleytuǵın kalciy, fosfor, temir, nerv sisteması ushın áhmiyetli bolǵan cink, yod, mıs sıyaqlı bir neshe organizm ushın kerekli zatlar bar.

Xosh, bul ónim tiykarınan qaysı mámleketlerden alıp kelinedi? Milliy statistika komitetiniń maǵlıwmatlarına bola, 2025-jıldıń yanvar-iyul aylarında Ózbekstan 13 mámleketten bahası 2,9 million AQSh dollarına teń bolǵan 6,5 mıń tonna gúrish import etken.
4,3 mıń tonna ónim Qazaqstannan alıp kelingen. Geografiyalıq jaqınlıq, logistika qolaylıǵı hám sawda baylanıslarınıń bekkemligi bul nátiyjeniń tiykarǵı sebeplerinen.
Hindstan gúrish eksportında dúnya jetekshileri qatarınan orın alǵan mámleket sıpatında Ózbekstanǵa 1,1 mıń tonna gúrish jetkerip bergen. Pakistannan bolsa 186 tonna gúrish import etilgen. Bul bolsa dúnyada jetistirilip atırǵan gúrishtiń eń jaqsı túrleri mámleketimiz bazarlarına kirip kiyatırǵanınan dárek beredi.
Qırǵızstan 582 tonna gúrish penen Ózbekstan bazarında sezilerli rol atqarǵan. Bul geografiyalıq jaqınlıq hám bajıxana-salıq sistemasındaǵı jeńillikler esabınan dep aytıw múmkin. Qıtay bolsa joqarıdaǵı mámleketlerge salıstırǵanda az (66 tonna) kólemde gúrish jetkerip bergen.
Ózbekstanda da gúrish jetistiriledi, biraq klimat ózgeriwi, suw resurslarınıń shekleniwi, egislik maydanlarınıń qısqarıwı sıyaqlı faktorlar gúrish ónimdarlıǵına tásir etpekte. Sol sebepli, import alternativ sheshim sıpatında qaralmaqta.

Dildora DWSMATOVA, ÓzA
ÓzA