Qazaqstan Respublikası Qarjı ministrligi Mámleketlik dáramatlar komitetiniń xabarına bola, “Tájen” shegara ótkeriw punkti (“Dawıt ata” shegara bajıxana postına tutas) arqalı fizikalıq tárepler, jeńil avtomobiller, avtobuslar hám ruqsat etilgen maksimal salmaǵı 3,5 tonnadan artıq bolmaǵan júk avtomobilleri háreketine sheklewler usı jıldıń 1-fevralınan 2025-jıldıń 31-dekabrine shekem sozıldı.

Sheklew múddetiniń sozılıwı Qazaqstan Respublikası tárepinen fizikalıq tárepler hám transport qurallarınıń qáwipsizligin támiyinlew, usı ótkeriw punktlerinde qurılıs jumıslarınıń ekinshi basqıshı ámelge asırılıwı múnásibeti menen qurılıs hám rekonstrukciya jumısların jedellestiriw, atap aytqanda, hákimshilik imaratlardı kapital ońlaw, jol qaplamaların betonlaw maqsetinde engizilmekte.
“Tájen” (Qazaqstan) – “Dawıt ata” (Ózbekstan) shegara ótkeriw punkti arqalı ruqsat etilgen maksimal salmaǵı 3,5 tonnadan artıq bolǵan júk avtomobilleri háreketleniwi múmkin. Sonday-aq, fizikalıq tárepler ushın “Qaraqalpaqstan” temir jol ótkeriw punkti arqalı “Nókis-Beynew” jónelisinde qosımsha jolawshı poezdlarınıń qatnawı jolǵa qoyıldı.

ÓzA