Ishki isler ministrligi Kiberqáwipsizlik orayınıń xabarına bola, Tashkentte puqaralardıń jeke maǵlıwmatları hám qarjıların nızamsız jol menen qolǵa kirgizip alǵan jınayıy topardıń jumısı ashıldı.

“Qáwipsiz kiber mákan” operativ-profilaktikalıq ilajlar sheńberinde ótkerilgen arnawlı reyd waqtında anıqlanıwınsha, topar aǵzaları Android qurılmaları ushın “apk” viruslı programmalar islep shıǵıp, olardı puqaralarǵa jibergen. Bul zıyanlı programmalar arqalı olar SMS xabarlar, qońırawlar hám baylanıs maǵlıwmatların qolǵa kirgizip, nızamsız dáramat arttırıp kelgen.
Tergew-sorastırıw dawamında viruslı programmalar Telegram toparlarına jalǵanǵan bolıp, onda 11 túrli mámleket puqaraları qatnasqanı málim boldı. Olar puqaralardıń jeke maǵlıwmatların urlaw menen shuǵıllanıp kelgen. Ótkerilgen operativ ilajlar nátiyjesinde topardıń 5 aǵzası qolǵa alındı.
Sonday-aq, olardıń jasaw mánzilleri hám telefon qurılmaları kózden ótkerilgende, 133 puqaradan derlik 3 milliard sum qarjı urlanǵanı anıqlanǵan. Urlanǵan pul qarjıları topar aǵzaları arasında bólistirilip kelgen.
Házirgi waqıtta gúmanlanıwshılarǵa Jınayat kodeksiniń tiyisli statyaları tiykarında jınayat isi qozǵatılıp, olar processual tártipte uslanǵan.
Tergew uyımları jınayıy toparǵa baylanıslı basqa da shaxslardı anıqlaw maqsetinde respublika boylap operativ-izlew ilajların dawam ettirmekte.

Hamroz Bayanov,
ÓzA