Shabdal mámleketimizde eń kóp jetistiriletuǵın miywelerden biri bolıp esaplanadı. Bul miywe S hám A vitaminlerine bay bolıp, ol kóriw hám immunitet ushın júdá áhmiyetli. Qalaberdi, kremniy, kaliy, fosfor, temir sıyaqlı mikro hám makro elementler bar. Shabdaldıń energiyalıq qunlılıǵı tiykarınan uglevodlardan ibarat.

Milliy statistika komitetiniń maǵlıwmatlarına bola, 2025-jıldıń birinshi jeti ayında Ózbekstan shabdal eksportı boyınsha tabıslı nátiyjelerge eristi. 87,9 mıń tonna ónim eksport etiliwi hám bunıń esabınan 80,5 million AQSh dolları dáramat alınıwı mámleketimiz miywe eksportındaǵı turaqlı ósiw hám básekige shıdamlılıqtı kórsetedi. Shabdal tek ǵana ishki bazarımızda emes, al xalıqaralıq maydanda da úlken talapqa iye bolǵan miywelerden biri bolıp esaplanadı.
Ózbekstan 2025-jıldıń yanvar-iyul aylarında eń kóp shabdal eksport etken mámleketler diziminde Rossiya birinshi orında tur.
Rossiya eń iri importyor mámleket sıpatında 69,9 mıń tonna shabdal qabılladı. Bul ulıwma eksport kóleminiń úlken bólegin quraydı. Qazaqstan 13,1 mıń tonna shabdal importı menen ekinshi orında turadı.
Qazaqstan bazarınıń Ózbekstan shabdalı ushın áhmiyetli ekenligi mámleketler arasındaǵı ekonomikalıq sawda baylanısların jáne de rawajlandırıw imkaniyatın beredi. Sonıń menen birge, Qırǵız Respublikası 4 mıń tonna shabdal satıp alıp, regionallıq eksport bazarındaǵı óz ornın bekkemledi.
Sonday-aq, Belarusqa 615 tonna hám basqa mámleketlerge 259 tonna shabdal eksport etilgen.
Juwmaqlap aytqanda, 2025-jıldıń jeti ayında shabdal eksportınıń kórsetkishleri Ózbekstan miywe eksportındaǵı tabıslı hám perspektivalı ósiwdi kórsetedi.
Regionallıq birge islesiwdi kúsheytiw hám bazarlardı keńeytiw arqalı mámleketimiz eksport potencialın jáne de arttırıw imkaniyatına iye boladı.

Dildora DWSMATOVA,
ÓzAnıń xabarshısı