Keshe Bishkek qalasında Ravshan Xaydarov basshılıǵındaǵı futbol boyınsha 23 jasqa shekemgi Ózbekstan saylandı komandası Aziya chempionatınıń tańlap alıw basqıshında Shri-Lanka saylandı komandası menen 1-tur oyının ótkerdi.
Mámleketimiz saylandı komandasınıń tolıq basımı astında ótken oyında komandamız aǵzaları 4:0 esabında jeńiske eristi.

Atap aytqanda, ushırasıwdıń 38-minutında Umarali Raxmonaliev esaptı ashqan bolsa, eki minuttan soń «Surxan» klubı futbolshısı Rustam Turdimurodov esaptı 2:0 ge jetkerdi.
Al, oyınnıń 52-minutında Turdimurodov jáne bir márte Shri-Lanka dárwazasın anıq nıshanǵa alǵan bolsa, 70-minutta Sardorbek Baxramov ushırasıwdaǵı eń sońǵı gol avtorına aylandı.
Itibarlı tárepi sonda, bul turnirde jeńimpaz komandamız quramında búgingi kúni «Olimpik-Mobiuz» komandasında oynap atırǵan qaraqalpaqstanlı jas futbolshılardan Muhammedali Reymov hám Samandar Muratbaevlar da bar.
Endi saylandı komandamız 6-sentyabr kúni turnirdiń 2-turında maydan iyeleri esaplanǵan Qırǵız Respublikası jasları menen óz-ara kúsh sınasadı.

Adilbay Orazov,
Qaraqalpaqstan xabar agentligi sholıwshısı