Múnásibet

Tyanczin qalasında bolıp ótken Shanxay birge islesiw shólkemi Mámleket basshıları keńesi hám “ShBSh plyus” sammitinde oǵada kóp máselelerge itibar qaratıldı. Qáwipsizlik, ekonomikalıq birge islesiw hám transport koridorları dıqqat orayında boldı.
Ózbekstan Prezidenti Shavkat Mirziyoevtiń shıǵıp sóylegen sózlerinde jáne bir áhmiyetli tárep – mádeniyat hám aǵartıwshılıqqa qaratılǵan baslamalar da ayrıqsha orın iyeledi.
Sebebi ruwxıy tatıwlıq xalıqlardıń qálbin jaqınlastıratuǵın eń isenimli kúsh bolıp esaplanadı.
– Prezidentimiz usınıs etken “Ullı jipek jolı mádeniy qarım-qatnası” joybarı mámleketlerdi birlestiretuǵın ruwxıy platforma wazıypasın atqaradı, – deydi Ózbekstan Respublikası mádeniyat ministri Ozodbek Nazarbekov. – Máselen, Samarqand shınında da Ullı jipek jolınıń júregi bolıp esaplanadı. Bizde mádeniy birge islesiwdiń jańa betin ashıw imkaniyatı bar. Bul qala ázelden hár qıylı civilizaciyalardıń tutasqan ornı bolǵan. Bul jerde ilim de, aǵartıwshılıq ta, mádeniy qarım-qatnas ta joqarı bolǵan. Usı mániste, “Ullı jipek jolı qarım-qatnası” baslaması tek ǵana tariyxıy miyrasqa súyenbeydi, al jańa ásirge ruwxıy jol ashadı.
Mámleketimiz basshısınıń jáne bir baslaması “Turistlik koridor” hám medicinalıq turizm alyansın jolǵa qoyıw ideyası boldı. Bul tek ǵana ekonomikalıq rawajlanıw emes, al xalıqlar arasında doslıqtı bekkemleytuǵın qádem bolıp esaplanadı. Turizm arqalı xalıqlar bir-biriniń mádeniyatın túsinedi, festival hám ánjumanlarda bolsa kewiller jaqınlasadı.
Mádeniy diplomatiya bul kewillerdiń tili esaplanadı. Júrekler bolsa hesh qashan qanday da bir shegaralar menen bólinbeydi.
Prezident Shavkat Mirziyoevtiń jaslarǵa qaratılǵan baslamaları bolsa ayrıqsha itibarǵa ılayıq. “ShBSh universiteti”niń onlayn kampusı, studentler ushın innovaciyalıq tańlawlar hám olimpiadalar, ilimiy birge islesiw baǵdarlamaları jaslardıń bilimge bolǵan talabın qanaatlandırıw, olardı jat ideyalardan saqlawǵa xızmet etedi.
Usı jaǵınan, bul baslamalar tek ǵana bilimlendiriw joybarı emes, al ekstremizmge qarsı eń nátiyjeli profilaktika quralı bolıp esaplanadı.
Tyanczin sammiti aǵartıwshılıq hám mádeniyat endi qosımsha baǵdar emes, al qáwipsizlik hám rawajlanıwdıń tiykarı ekenin jáne bir márte dálilledi.

ÓzAnıń xabarshısı
Ikrom AVVALBOEV
jazıp aldı.