Siriya nefti dúnya bazarına qaytıwı mámleket ekonomikasın tiklew jolındaǵı isenimli qádem bolıp esaplanadı.
SANA xabarına bola, bul arab mámleketiniń neft transportı kompaniyası keyingi 14 jıl ishinde birinshi márte rásmiy túrde ónim jetkerip beretuǵının málim etti.

“BB Energy”global treyderi “B Serve Energy” xalıqaralıq kompaniyası ushın Tartus portındaǵı “Nissos Christiana” tankerine 600 000 barrel awır neft júklendi. Energetika ministrliginiń maǵlıwmatına bola, eksport etiletuǵın shiyki zat bir neshe kánnen qazıp alınǵan, sonday-aq, Baniyas hám Xomstaǵı neftti qayta islew zavodlarında toplanǵan artıqsha ónimnen ibarat.
Tartustan 35 km arqada Baniyada Siriyanın en iri neftti qayta islew zavodı hám qánigelesken neft portı jaylasqan. Ministrliktiń Neft hám gaz departamenti direktorınıń járdemshisi Riyod Al-Jubasiy “Reuters” xabarshısına málim etiwinshe, kelisim usı jıldıń iyun ayında AQSh sankciyası biykar etilgeninen keyin ámel ete baslaǵan.
– Bul transport sisteması, tankler hám teńiz terminalınıń tolıq paydalanıwǵa tayar ekenligin tastıyıqlaytuǵın áhmiyetli tájiriybe, – degen xızmetker.
Jergilikli baspasóz neft eksportı Siriya húkimetiniń kórsetpesi hám Energetika ministrligi janındaǵı Neft bas basqarması islep shıqqan mámlekettiń sırtqı neft bazarındaǵı qatnasıw kólemin keńeytiw rejesi sheńberinde jolǵa qoyılıp atırǵanın atap ótpekte.
– Eksport procesi endi úzliksiz dawam etedi, dep úmit etemiz, – deydi Neft transport kompaniyasınıń bas direktorı Man Basha. – Sanaattı modernizaciyalaw joybarları jergilikli qánigeler tárepinen ámelge asırılmaqta. Neft kánleriniń kópshiligi mámlekettiń arqa-shıǵısında, kurd húkimeti qadaǵalawındaǵı aymaqta jaylasqan. Kánler fevraldan Damasktaǵı oraylıq húkimetke shiyki zat jetkerip bere basladı.
2011-jılǵı puqaralar urısına shekem neft jalpı ishki ónimniń 20 procenti, eksporttıń yarımı hám mámleket dáramatınıń 50 procentten aslamın quraǵan. Sol waqıtta kúnine 380 000 barrel neft eksport etilgen. 14 jıllıq urıs ekonomika hám infrastrukturanı wayran etti hám kánler qayta-qayta qoldan-qolǵa ótti. Nátiyjede Siriya elektr energiyasın islep shıǵarıw boyınsha Iran neftine qatań baylanıp qaldı. 2024-jıl dekabrde Bashar Asad hákimiyattan awdarılǵannan keyin bolsa támiynat toqtap qaldı.
Sonıń ushın endi jańa basshılıq tarawdı tiklew, sırt el kompaniyaları menen birge islesiw ornatıw hám mámleketke valyuta tartıw ushın keń kólemli reforma alıp barmaqta.

G.Sattorova. ÓzA