Múnásibet

Prezidentimiz Shavkat Mirziyoev Tyanczin qalasında Shanxay birge islesiw shólkemi Mámleket basshıları keńesiniń gezektegi májilisinde qatnasıp, shıǵıp sóyledi. ShBShnıń siyasiy, ekonomikalıq, qáwipsizlik hám gumanitarlıq baǵdarların qamtıp alǵan áhmiyetli baslamalardı alǵa qoydı. Sonıń ishinde, mámleketimiz basshısı tárepinen ekologiya baǵdarında da bir qatar usınıs hám baslamalar bildirildi.
Abdushukur Hamzaev,
Ózbekstan Ekologiyalıq partiyasınıń baslıǵı, frakciya basshısı:
– Shanxay birge islesiw shólkemi Mámleket basshıları keńesiniń gezektegi májilisinde Prezidentimiz tárepinen klimattıń ózgeriwine beyimlesiw, hawaǵa záhárli elementler shıǵarılıwın azaytıw hám ekologiyalıq qáwip-qáterlerdi aldınnan boljawda jasalma intellekt texnologiyaların engiziw arqalı ShBSh sheńberinde “jasıl” transformaciyanı jedellestiriw zárúr ekenligi ayrıqsha atap ótildi. Bul usınıslar tek ǵana regionallıq emes, al global áhmiyetke iye.
Tyanczin deklaraciyası hám ShBShnı 2035-jılǵa shekem rawajlandırıw strategiyası sheńberinde “jasıl rawajlanıw” tiykarǵı baǵdar sıpatında belgilengeni Ózbekstan baslamalarınıń nátiyjesi sıpatında qaralmaqta. Bul xalıqaralıq kólemdegi ekologiyalıq birge islesiwdi jáne de tereńlestiriw ushın bekkem huqıqıy hám siyasiy tiykar bolıp esaplanadı.
Ózbekstan Ekologiyalıq partiyası bul baslamalardı ámeliy háreketlerge aylandırıwda birge islesiwshi shólkemler, jámiyetshilik hám ilimiy toparlar menen tıǵız birgelikte belsene qatnasadı.
Gulchehra Tojiboeva,
Ózbekstan Ekologiyalıq partiyası frakciyasınıń aǵzası:
– Prezident Shavkat Mirziyoevtiń shıǵıp sóylegen sózinde ekologiya hám klimat ózgeriwi máselesine itibar qaratılǵanı, álbette, global mashqalalardı sheshiwde mámleketimiz belsendi poziciya iyelep atırǵanın kórsetedi.
Búgin dúnyada klimat ózgeriwi insaniyat ushın eń úlken qáwiplerden biri sıpatında bahalanbaqta. Bul processten ShBSh aymaǵındaǵı mámleketler de shette qalmaydı. Prezidentimiz usınıs etken baslamalar mine, usı mashqalalarǵa sheshim tabıwǵa qaratılǵanı menen áhmiyetli.
Bárinen burın, “jasıl” koridorlar hám zamanagóy ekologiyalıq infrastruktura haqqındaǵı usınıslar itibarǵa ılayıq. Bul tek ǵana ekonomikalıq nátiyje emes, al tábiyatqa hám qorshaǵan ortalıqqa itibarlı qatnasta bolıwdı kúsheytedi. Sonıń menen birge, jasalma intellekt járdeminde klimat ózgerislerin boljaw, qáwip-qáterlerdi aldınnan kóriw sıyaqlı ideyalar zamanagóy hám áhmiyetli sheshim sıpatında kórindi.
Sonday-aq, “jasıl” sanaat tarawında birge islesiwdi keńeytiw hám arnawlı Klimat keńesin dúziw usınısları – búgingi kún talaplarına sáykes keletuǵın áhmiyetli baslamalar bolıp esaplanadı. Ásirese, Aralboyı regionında ámelge asırılatuǵın ekologiyalıq hám innovaciyalıq joybarlar pútkil region ushın turmıslıq áhmiyetke iye.
Menińshe, bul baslamalardıń artında bir haqıyqat jatadı: ekonomikalıq rawajlanıw ekologiyadan uzaq bolmawı kerek. Jasıl texnologiyalar, qayta tikleniwshi energiya hám tábiyatqa abaylı qatnas – turaqlı keleshektiń tiykarǵı negizi.
ShBSh minberinen jańlaǵan bul usınıslar tek ǵana region emes, al pútkil dúnya kóleminde de áhmiyetli. Sebebi, búgingi ekologiyalıq qáwip-qáterler mámleketlerdi bólek-bólek emes, al birgelikte háreket etiwge iytermelemekte. Solay eken, Prezidentimizdiń shıǵıp sóylegen sózinde alǵa qoyılǵan ideyalar keleshekte mámleketimiz hám pútkil regionda ekologiyalıq turaqlılıqtı támiyinlewde jańa baǵdar ashatuǵınına isenemen.

ÓzAnıń xabarshısı Muhtarama Komilova jazıp aldı.