Vitebsk qalasında Ózbekstan Jurnalistleri awqamı menen Belarus Jurnalistler awqamı arasında birge islesiw memorandumına qol qoyıldı.

Ózbekstan Respublikası Oliy Majlisi Senatı hám Belarus Respublikası Milliy Majlisi Respublika Keńesi menen birgelikte shólkemlestirilgen III Belarus-Ózbekstan biznes-forumı sheńberinde kelisilgen bul hújjet eki mámleket media tarawı wákilleri arasında birge islesiw baylanısların rawajlandırıwǵa xızmet etedi.
– Bul memorandumda ózbekstanlı jurnalistlerdiń Belarusqa, belaruslı jurnalistlerdiń Ózbekstanǵa saparların ámelge asırıw, taraw boyınsha tájiriybe almasıwdı jolǵa qoyıw hám rawajlandırıw názerde tutılǵan, – dedi Ózbekstan Jurnalistler awqamı baslıǵınıń wazıypasın atqarıwshı Xalmurat Salimov. – Sonday-aq, birge islesiw sheńberinde birgeliktegi tájiriybe arttırıw ilajları – ǵalaba xabar quralları wákilleri ushın konferenciyalar, media forumlar, press-turlar shólkemlestiriw belgilengen. Jurnalistlerdi akkreditaciyadan ótkeriw, jurnalistlik jumıs ushın ruqsatnamalar alıw máselelerinde táreplerdiń bir-birine járdem beriwi de óz kórinisin tapqan. Bul hújjet Ózbekstan hám Belarus jurnalistikasınıń rawajlanıwına, óz-ara doslıq baylanısları bunnan bılay da bekkemleniwine xızmet etedi.
Ilaj juwmaǵında Belarus Jurnalistler awqamınıń baslıǵı Andrey Krivosheevke Ózbekstan Jurnalistler awqamınıń sawǵası tapsırıldı.

Xamroz Bayanov, ÓzA