Ózbekstan Respublikası Prezidenti Shavkat Mirziyoevtiń Qıtay Xalıq Respublikasına rásmiy saparınıń ilajlarǵa bay baǵdarlaması juwmaqlandı.

Mámleketimiz basshısı 31-avgust kúni ómirlik joldası menen birge Tyanczin qalasındaǵı “Meyczyan” kongress orayında Shanxay birge islesiw shólkemi sammitiniń rásmiy emes ilajlarında qatnastı.
Ózbekstan jetekshisi 1-sentyabr kúni ShBSh Mámleket basshıları keńesiniń gezektegi májilisi hám “ShBSh plyus” formatındaǵı ushırasıwda qatnasıp, kóp tárepleme birge islesiwdi jáne de bekkemlew hám shólkemniń jumısın jetilistiriw boyınsha bir qatar baslamalardı alǵa qoydı.
2-sentyabr kúni Pekin qalasında Qıtay Xalıq Respublikası Baslıǵı Si Czinpin menen rásmiy delegaciyalardıń qatnasıwında sóylesiwler bolıp ótti. Ushırasıw juwmaǵında ámeliy birge islesiwdiń tiykarǵı baǵdarları boyınsha eki tárepleme hújjetlerdiń salmaqlı toplamına qol qoyıldı.
Sonday-aq, Prezidentimiz Rossiya Federaciyası Prezidenti Vladimir Putin menen ushırasıp, eki tárepleme birge islesiwdiń áhmiyetli máselelerin dodaladı.
Mámleketimiz basshısı Qıtay Bas ministri Li Cyan, sırt el delegaciyalarınıń basshıları hám isbilermen toparlardıń wákilleri menen de nátiyjeli ushırasıwlar ótkerdi.
Ózbekstan Prezidenti 3-sentyabr kúni Pekin qalasında Ekinshi jer júzilik urıs juwmaqlanǵanınıń 80 jıllıǵı múnásibeti menen ótkerilgen Jeńis paradında qatnastı.
Sapar ilajları juwmaqlanǵannan soń, mámleketimiz basshısı Tashkentke jónep ketti. Joqarı mártebeli miymanlardı Qıtay rásmiyleri shıǵarıp saldı.

ÓzA