Jańa qarar

Hár bir taraw, hár bir aymaq, hár bir máhálle – tek ǵana isbilermen háreket etkende, olarǵa qulaq salıp, isenim bildirilgende rawajlanadı, abat boladı. Bul sózlerdi Prezidentimiz 20-avgust kúni isbilermenler menen bolıp ótken ashıqtan-ashıq sóylesiwde ayrıqsha atap ótti.
Usı jıl 12-avgust kúni Ózbekstan Respublikası Prezidentiniń “Jeke tártiptegi isbilermenler hám ózin-ózi bánt etken shaxslar ushın qolaylı sharayat jaratıw ilajları haqqında”ǵı qararı qabıl etildi.
Jasırın ekonomikanıń úlesin sezilerli dárejede qısqartıw, salıq salıw bazasın keńeytiw, fizikalıq tárepler ushın nızamlı jumıstıń tartımlılıǵın arttırıw jolında qabıl etilgen bul qarar boyınsha Ózbekstan Respublikası Sawda-sanaat palatası baslıǵınıń keńesgóyi Umidbek SAFAROVtıń pikirleri menen qızıqsındıq.
– Isbilermenlik etpekshi bolǵan hár qanday shaxs ushın jańa dáwir baslandı, – dep pikirin basladı U.Safarov. – Hámmemizge belgili, Prezidentimizdiń 12-avgustta “Jeke tártiptegi isbilermenler hám ózin-ózi bánt etken shaxslar ushın qolaylı sharayat jaratıw ilajları haqqında”ǵı qararı qabıl etildi hám onda 2026-jıldıń 1-yanvarınan baslap jeke tártiptegi isbilermenler hám ózin-ózi bánt etken shaxslar ushın jańa huqıqıy tártip jaratıladı.
Xosh, bunıń mánisi qanday, jańa huqıqıy tártip degende neni túsiniw múmkin? Bul sonı ańlatadı, endi isbilermenler óziniń 1 milliardqa shekemgi aylanıs qarjısınan tek ǵana bir procent muǵdarında salıq tólewi belgilep qoyıldı. Bunı bolsa arnawlı platforma arqalı ámelge asırıw múmkin, yaǵnıy, máselen, mobil qosımsha jaratılıp, ol arqalı Face-ID menen dizimnen ótiledi. Jeke tártiptegi isbilermen yamasa ózin-ózi bánt etken shaxs baǵdarın belgilep, isbilermenge aylanıwı múmkin.
Qolaylı tárepi sonda, isbilermende artıqsha juwapkershilikler bolmaydı. Yaǵnıy salıq esabatların isbilermenniń ózi tapsırmaydı. Bul qarar arqalı salıq esabatların isbilermen ushın platforma iyeleri tapsıradı hám juwapkershilikti aladı.
Isbilermennen bolsa platforma arqalı ónim satıp atırǵanda QR-kod arqalı dizimnen ótiw soraladı, bolǵanı. Bul arqalı platforma siz ushın esaplawdı baslaydı. Isbilermenler endi mine, usınday imkaniyatlardan paydalanatuǵın kúnler de jetip keldi.
Bunnan tısqarı, elektron “koshelyoklar” bar ekenin bilemiz. Onda jeke tártiptegi isbilermen yamasa ózin-ózi bánt etken shaxs sıpatında dizimnen ótkennen soń, jeke tártiptegi isbilermen yamasa ózin-ózi bánt etken shaxs bankke barıp, esap bet ashıwǵa zárúrlik joq. Sol platformada sizge elektron “koshelyok” ashıladı. Onıń banktegi esabıńız benen huqıqıy statusı birdey boladı. Onda isbilermen qarjını elektron “koshelyok”ke túsiriwi hám qálegen jerge ótkeriwi yamasa naq túrde alıwı múmkin.
Bul platforma jáne qanday qolaylıq jaratadı, degen soraw tuwılsa, aytıw múmkin, hár qıylı shártnamalardı, esap qaǵazların hám aktlerdi de usı arqalı qáliplestiriw múmkin. Qararda belgilengenindey, bular qol qoyılǵan qaǵazlarǵa teńlestirilgen hújjet bolıp esaplanadı.
Jáne bir qolaylıq bolsa isbilermen jumısshılardı Face-ID arqalı rásmiylestirip qabıl etiw imkaniyatına iye boladı. Olarǵa tólenetuǵın aylıqtı qálese kúndeligin beriwi de múmkin. Onda jumısshı-xızmetkerlerden alınatuǵın dáramat salıǵın da platformanıń ózi quraydı.
Haqıyqatında da, Prezidentimiz reformalardıń dáslepki kúnlerinen-aq isbilermenler menen pikirles bolıp, ekonomikası qúdiretli, sanaatı básekige shıdamlı, finanslıq sisteması turaqlı, barlıq tarawları investorlar ushın tartımlı bolǵan Jańa Ózbekstandı qurıwǵa kiristi.
Jaqında shólkemlestirilgen isbilermenler menen ashıqtan-ashıq sóylesiwde bolsa dástúrge bola, kishi biznes wákillerinen baslap iri kárxanalardıń basshıları – eń aldıńǵı hám pidayı isbilermenler sıylıqlandı. Bunday itibar elimizdiń rawajlanıwına úles qosıp kiyatırǵan isbilermenlerge isenim, usı tarawǵa qádem qoyıwdı qálegen jaslarǵa bolsa úmit baǵıshlap atırǵanı haqıyqat.

ÓzAnıń xabarshısı
Abdulaziz RUSTAMOV.
jazıp aldı.