Awǵanstanda 1-sentyabr kúni júz bergen jer silkiniw qurbanlarınıń sanı 1124 adamǵa jetti. Bul haqqında Qızıl yarım ay jámiyetiniń gumanitar toparı xabar berdi. Tábiyǵıy apatshılıqta keminde 3251 adam jaraqatlanǵan, 8 mıńnan aslam úy búlingen. Qutqarıw toparları shıǵıs tawlı aymaqlarda izlew jumısların dawam ettirmekte. Jaradarlar Kunar qalasınan Nangarxar wálayatına vertolyotlar arqalı evakuaciya etilmekte. Jollardaǵı búlginshilik sebepli ayırım aymaqlarǵa qutqarıwshılar elege shekem jetip barmaǵan.

Ullı Britaniyada 1884-jıldan berli eń ıssı jaz dizimge alındı. Klimat ózgeriwi sebepli keleshekte anomal ıssılıq tez-tez baqlanıwı múmkin. Bul haqqında Reuters xabar berdi. Mámlekette jaz máwsiminde tórt ıssılıq tolqını atap ótildi. Iyun, iyul hám avgust aylarında ortasha temperatura 16,1 gradus Celsiy boldı, bul 2018-jıldaǵı 15,76 gradustı artta qaldırǵan.
Finlyandiyanıń Mikeli qalasında NATO qurǵaqlıq armiyaları regionallıq sárkardalıǵı shtabı rásmiy jumıs basladı. Bul haqqında mámlekettiń qurǵaqlıq áskerleri óziniń rásmiy saytında járiyaladı. Qala Rossiya shegarasınan tek 140 kilometr, Sankt-Peterburgtan bolsa 304 kilometr uzaqlıqta jaylasqan. Aldın Rossiyaǵa eń jaqın NATO sárkardalıǵı shtabı Polshanıń Щecin qalası edi. Ol Kaliningradtan 414 kilometr uzaqlıqta jaylasqan.
Sudannıń Marra tawlarında jaylasqan awılda júz bergen kúshli qar qulaması aqıbetinde mıńnan aslam adam qaytıs boldı. Bul haqqında Batıs Sudan regionın qadaǵalap atırǵan Azatlıq háreketi 2-sentyabr kúni bayanat berdi. Málim etiliwinshe, tábiyǵıy apatshılıq 31-avgust kúni, aymaqta bir neshe kún dawam etken kúshli jawınlar aqıbetinde júz bergen. Háreket jetekshisi Abdulvahid Muhammad Nur qar qulaması awıldı pútkilley jer menen jeksen etkeni, tek ǵana 1 adam tiri qalǵanın málim etken. Sudan azatlıq háreketi Birlesken Milletler Shólkemi hám xalıqaralıq gumanitar shólkemlerge múrájat etip, qaytıs bolǵanlardıń denelerin qar qulaması astınan alıp shıǵıwda járdem soramaqta.
Evropa komissiyası basshısı Ursula fon der Lyayen 31-avgust kúni Bolgariyaǵa qonıwǵa urınıp atırǵanda GPS navigaciya menen baylanıslı mashqalalarǵa dus keldi. Bul haqqında komissiya wákili SNN telekanalına málim etti. Evrokomissiya Bolgariya rásmiyllerinen “bunı Rossiya ámelge asırǵan bolıwı múmkin” degen maǵlıwmat alǵan. Kreml bolsa bul ayıplawdı biykarlamaqta. Ursula fon der Lyayen bolǵan samolyot qáwipsiz qonıwdı ámelge asırǵan, ushıwshılar samolyottı qaǵaz kartalar járdeminde qondırǵan.

Qaraqalpaqstan xabar agentligi