Mámleketimiz elshixanası tárepinen Islamabad qalasında Ózbekstan mámleketlik ǵárezsizliginiń 34 jıllıǵı múnásibeti menen rásmiy qabıllaw máresimi ótkerildi, dep xabar beredi “Dunyo” MA.

Ilajǵa qabıllawshı mámleket húkimetiniń joqarı mártebeli wákilleri, sonıń ishinde, tiykarǵı miyman sıpatında temir jollar ministri Muhammad Hanif Abbasi qatnastı. Sonday-aq, sırt eldegi pakistanlılar isleri hám insan resursların rawajlandırıw ministri CHoudri Salik Husayn, Bas ministrdiń arnawlı járdemshileri hám koordinatorları, senatorlar, mámleketlik uyımlardıń basshıları, Qurallı Kúshler, elshiler hám diplomatlar, jámiyetlik shólkemler, isbilermen topar, akademiyalıq jámáát, ǴXQ hám belsendi watanlaslar qatnastı.
Qabıllaw máresimi eki mámlekettiń milliy gimnleriniń namaları astında baslandı.

Ózbekstan elshisi óziniń shıǵıp sóylegen sózinde elimizde ámelge asırılıp atırǵan reformalar hám turaqlı ekonomikalıq rawajlanıw haqqında maǵlıwmat berdi. Sonıń ishinde, Ózbekstan JIÓ keyingi jıllarda turaqlı ósimge erisip, 2024-jılı 115 milliard AQSh dolların quraǵanı, bıyıl bolsa 130 milliard dollardan artıwı kútilip atırǵanı atap ótildi. Milliy ekonomikanıń eksport quwatlılıqları 26 milliard dollarǵa jetkeni, altın-valyuta rezervleri birinshi márte 48 milliard dollardan artqanı atap ótildi. Sonıń menen birge, Ózbekstanǵa tartılǵan sırt el investiciyalarınıń muǵdarı derlik 130 milliardqa jetkeni atap ótildi.
– Ózbekstan hám Pakistan arasındaǵı qatnasıqlar strategiyalıq sheriklik dárejesine kóterilgen, – dedi elshi Alisher Twxtaev. – Eki mámleket basshıları tárepinen qol qoyılǵan Birgeliktegi deklaraciya hám Strategiyalıq sheriklik joqarı keńesi haqqındaǵı protokol tariyxıy áhmiyetke iye bolıp, uzaq múddetli birge islesiw ushın bekkem tiykar jarattı. Sonday-aq, “Ózbekstan – Awǵanstan – Pakistan” temir jolı qurılısınıń joybarı regionallıq integraciyada úlken áhmiyetke iye.
Pakistan temir jolları ministri Muhammad Hanif Abbasi óziniń shıǵıp sóylegen sózinde, Shahboz Sharif húkimeti atınan Ózbekstan Prezidenti hám xalqın Ǵárezsizlik kúni menen qutlıqlap, tınıshlıq hám abadanlıq tileklerin jetkerdi. Ol, sonday-aq, eki mámleketti tıǵız baylanıstırıp turǵan ulıwmalıq tariyx hám uqsas mádeniy qádiriyatlardı atap ótip, Ózbekstandı regiondaǵı tiykarǵı birge islesiwshi sıpatında bahaladı hám óz-ara sawda kólemin 2 milliard dollarǵa jetkeriw boyınsha izbe-iz qádemlerdi qollap-quwatlaytuǵının bildirdi.
Ilaj sheńberinde Ózbekstannıń sociallıq-ekonomikalıq hám mádeniy turmısı, sırtqı siyasattaǵı jetiskenliklerine baǵıshlanǵan fotokórgizbe, milliy ónermentshilik buyımları, saz ásbapları, kitaplar hám milliy taǵamlar kórsetildi. Máresim bayram dasturxanı hám Xorezmnen mirát etilgen kórkem óner sheberleriniń atqarıwındaǵı milliy nama-qosıqlar menen dawam etti.
1-sentyabr kúni Islamabadtaǵı eń biyik “Mövenpick” miymanxanası imaratındaǵı úlken ólshemli ekranda Ózbekstan mámleketlik ǵárezsizligi bayramı múnásibeti menen qutlıqlaw videoroligi kún dawamında kórsetilip turǵanın ayrıqsha atap ótiw kerek.

Qaraqalpaqstan xabar agentligi