Tyanczin sammiti juwmaqları boyınsha ShBSh jańa baqlawshı mámleketler hám sóylesiw boyınsha sherikler qabıl etiliwin járiyalawı múmkin, dep intervyu berdi “RIA Novosti”ǵa bul strukturanıń bas xatkeri Nurlan Ermekbaev.

– Men baqlawshı yamasa dialog boyınsha sherik statusın alıw ushın arza bergen mámleketlerdiń atın házirshe málim ete almayman, – dedi ol. – Sonı atap ótiwdi qáler edim, bul arzalar aǵza mámleketler tárepinen kórip shıǵılmaqta hám qabıl etilgen qararlar sammit juwmaqları boyınsha járiyalanadı.
Bas xatkerdiń atap ótiwinshe, keńeyiw ShBShnıń transregionallıq birlespe sıpatında rawajlanıwındaǵı logikalıq process bolıp esaplanadı.
Sonday-aq, ol Awǵanstan menen birge islesiw máselesine de toqtap ótti.
– Bizge belgili, ShBShǵa aǵza barlıq mámleketler Awǵanstan húkimeti menen eki tárepleme tiykarda birge islesedi,-dedi N.Ermekbaev. – Shólkem bul úlkedegi jaǵdaydı dıqqat penen baqlap barmaqta.
Onıń qosımsha etiwinshe, Awǵanstandaǵı ekonomikalıq jaǵday unamlı tárepke jaqsılanbaqta, biraq gumanitarlıq hám sociallıq tarawlarda, sonıń ishinde, hayal-qızlar huqıqları hám terrorizmge qarsı gúresiwde mashqalalar saqlanıp qalmaqta.
Maǵlıwmat ornında: ShBSh 2001-jılı shólkemlestirilgen xalıqaralıq shólkem bolıp, onıń quramına Belarus, Hindstan, Iran, Qazaqstan, Qıtay, Qırǵızstan, Rossiya, Tájikstan, Pakistan hám Ózbekstan kiredi. Baqlawshı mámleketler – Awǵanstan hám Mongoliya, birge islesiwshi mámleketler – Ázerbayjan, Armeniya, Kambodja, Nepal, BAÁ, Túrkiya hám Shri-Lanka bolıp esaplanadı.

ÓzA