Ózbekstan Respublikası parlament delegaciyası Belarus Respublikasına keldi.

Vitebskte ótip atırǵan biznes-forum sheńberinde Ózbekstan Respublikası Oliy Majlisi Senatınıń Baslıǵı Tanzila Norboeva Belarus Respublikası Milliy májilisi Respublikalıq Keńesiniń Baslıǵı Natalya Kochanova menen ushırastı.
Onda siyasiy, sawda-ekonomikalıq, mádeniy-gumanitarlıq hám parlamentleraralıq birge islesiw máseleleri kórip shıǵıldı. Atap ótilgenindey, eki mámleket basshıları arasındaǵı sóylesiw hám joqarı dárejedegi sapar etiwler mámleketleraralıq qatnasıqlardı jańa basqıshqa alıp shıqtı.
Eki mámleket arasındaǵı tovar almasıw kólemi keyingi jılları 5 esege arttı. Sanaat kooperaciyası, awıl xojalıǵı, densawlıqtı saqlaw hám turizm tarawlarında birgelikte joybarlar ámelge asırılmaqta.
Mádeniy-gumanitarlıq tarawda “Sharq taronalari”, “Slavyanskiy bazar” sıyaqlı festivallar ótkeriw arqalı birge islesiw kúsheytilgeni atap ótildi. Bilimlendiriw baǵdarında 45 joqarı bilimlendiriw shólkeminiń birge islesiwi jolǵa qoyılıp, eki mıńnan aslam student bilim almaqta.
Parlamentleraralıq baǵdarda saparlar, birgeliktegi forumlar hám komissiyanıń jumısı izbe-iz dawam etpekte. Usı jılı “Doslıq toparı” birge islesiw boyınsha parlamentleraralıq komissiyaǵa aylandırılǵanı áhmiyetli qádem sıpatında bahalandı.
Ushırasıw juwmaǵında parlamentleraralıq birge islesiwdi rawajlandırıwǵa baylanıslı hújjetlerge qol qoyıldı.

***
Oliy Majlis Senatınıń Baslıǵı Tanzila Norboeva basshılıǵındaǵı Ózbekstan delegaciyası Vitebsk qalasındaǵı Jeńis maydanında Ekinshi jer júzilik urıs jıllarında qaytıs bolǵan jawıngerlerdiń esteligine baǵıshlanǵan estelik kompleksine gúl qoyıw máresiminde qatnastı.

N.Abduraimova,
ÓzA