Bul haqqında jámiyettiń málimleme xızmeti xabar berdi. Onda jazılıwınsha, mámleketimiz basshısınıń 2025-jıl 30-yanvardaǵı “Ózbekstan – 2030” strategiyasın “Qorshaǵan ortalıqtı qorǵaw hám “jasıl ekonomika” jılında ámelge asırıwǵa baylanıslı mámleketlik baǵdarlama haqqında”ǵı pármanınıń orınlanıwı sheńberinde shólkem basqıshpa-basqısh joqarı oktanlı (AI-92) avtobenzin islep shıǵarıwǵa ótpekte.

Pármanǵa bola, sentyabrden baslap birja sawdalarına tek ǵana joqarı oktanlı benzin jaylastırılıwı belgilengen. Soǵan tiykarlanıp, “Ózbekneftgaz” AJ 2025-jıl 2-sentyabrden baslap AI-80 benzinin satıwdı toqtattı. Onıń ornına AI-92 markalı avtobenzinniń birja sawdalarındaǵı kólemleri arttırıldı.
Eger aldın 1000 tonna AI-92 benzini birja sawdalarına qoyılǵan bolsa, házirgi waqıtta bul muǵdar 1720 tonnaǵa jetken. Ishki bazar talabınan kelip shıǵıp, kólemlerdi jáne de arttırıw imkaniyatı bar ekenligi atap ótilmekte.
Sonday-aq, usı jılı avgust ayında isbilermen-tutınıwshılar tárepinen satıp alınǵan AI-80 benzini sentyabr ayında da qaldıqlar hám minnetlemeler tiykarında óz iyelerine jetkerip beriledi.

ÓzA