Erteń Samarqandta sıylıq qorı 855 mıń AQSh dollarınan ibarat “Grand Swiss 2025” turniri baslanadı.
Búgingi kúnge shekem turnirde qatnasıw ushın arzalardı tapsırǵan dúnya shaxmatınıń onlaǵan jarqın wákilleri áyyemgi qalaǵa jetip keldi.

Keshe Xalıqaralıq shaxmat federaciyası delegaciyası qatarında ukrainalı Anna hám Mariya Muzıchuk, Ispaniyanıń abırayın qorǵap atırǵan Aleksey Shirov sıyaqlı bir qatar shaxmatshılar jetip keldi.
Búgin, 2-sentyabr kúni erte tańda germaniyalı Vinsent Kaymer, niderlandiyalı Anish Giri, vengriyalı Richard Rapport, franciyalı Maksim Vashe-Lagrav, rossiyalı Polina Shuvalova, qazaqstanlı Bibisora Asaubayeva, FIDE bayraǵı astında turnirde qatnasatuǵın Volodar Murzin sıyaqlı grossmeysterler kútip alındı.
Sonday-aq, kún dawamında jáhán chempionı Dommaraju Gukesh, turnirdiń birinshi sanlı qatnasıwshısı Rameshbabu Praggnanandha, Anna Shaxman sıyaqlı 50 ge shamalas shaxmatshılar jetip keliwi kútilmekte.
Xosh, 2026-jılǵı jáhán chempionatına jollamalar usınatuǵın Samarqand bellesiwlerinde kimlerdiń imkaniyatı joqarı hám qaysı shaxmatshılardıń oyınların baqlap barıw kerek boladı?
Álbette, turnirde bellesetuǵın 116 er adam hám 56 hayal shaxmatshınıń hár biri ózine tán tartımlı oyın kórsetetuǵını sózsiz.
Biraq olardıń arasında “Grand Swiss 2025” turniriniń birinshi sanlı qatnasıwshısı Rameshbabu Praggnanandha, ámeldegi jáhán chempionı Dommaraju Gukesh, jaqında Hindstanda ótkerilgen abıraylı turnirde jeńimpaz bolǵan germaniyalı Vinsent Kaymer, 2021-jılǵı “Grand Swiss” jeńimpazı Aliriza Firuzja qatarında Anish Giri, Vidit Santosh Gujrati, Nodirbek Abdusattorov, Levon Aroniyan sıyaqlı onlaǵan vunderkindlerdiń hár bir oyını klassikalıq shaxmattıń jedelligin kórsetip beriwi menen áhmiyetli bolıp esaplanadı.
Hayal-qızlar arasındaǵı bellesiwlerde qıtaylı CHjuni Tan, ukrainalı Anna Muzichuk, qazaqstanlı Bibisara Asaubaeva, rossiyalı Katerina Lagno, hindstanlı Xarika Dronavalli qatarında jerleslerimiz Afruza Hamdamova, Umida Omonova, Gulruhbegim Tohirjonova qatnasıwındaǵı bellesiwler shaxmat ıqlasbentleriniń dıqqat orayında bolatuǵını sózsiz.
Esletip ótemiz, “Grand Swiss 2025”tiń erler jarısında jerleslerimizden Nodirbek Abdusattorov, Javohir Sindorov, Nodirbek Yoqubboev, Shamsiddin Vohidov, Muhiddin Madaminov, Jahongir Vohidov, Muhammadzohid Suyarov, Ortiq Niǵmatov, Abdumalik Abdusalimov, hayal-qızlar toparında Gulruhbegim Tohirjonova, Afruza Hamdamova, Umida Omonova, Guldona Karimova hám Madinabonu Xalilova jeńimpazlıq jolında jarısqa qatnasadı.
Tilegimiz, Samarqand bellesiwlerinde saylandı komandamız aǵzaları múnásip oyın kórsetip, dúnya shaxmat maydanında ózbek sportınıń jańa jeńis bayraǵın bálent kótersin.

Twlqin Rwziev, ÓzA