Búgin Kegeyli rayonı Gújim terek mákan puqaralar jıyını turǵınları ushın oǵada quwanıshlı kún boldı desek, aljaspaǵan bolamız. Sebebi, 2-sentyabr-Bilimler kúni sánesinde rayon basshıları tárepinen aymaq xalqı ushın jańadan qurılǵan zamanagóy 29-sanlı mektep imaratı jańa oqıw jılına sawǵa sıpatında paydalanıwǵa tapsırıldı.

Mekteptiń ashılıw máresiminde rayon hákimi A. Kamalov qatnasıp, aymaq xalqın hám mektep jámáátin Ózbekstan Respublikası Ǵárezsizliginiń 34 jıllıq bayramı, jańa oqıw jılınıń baslanıwı hám jańa mekteptiń ashılıwı menen qutlıqladı. Ilajda Prezidentimizdiń basshılıǵında respublikamızda ámelge asırılıp atırǵan keń kólemli reformalarǵa joqarı baha berilip, bunday ǵamqorlıqlardan xalqımız minnetdar ekenligi atap ótildi.
-Ózbekstan Respublikası Prezidentiniń «2024-2026-jıllarda Ózbekstan Respublikasınıń sociallıq hám óndirislik infrastrukturasın rawajlandırıw ilajları haqqında»ǵı 404-sanlı qararı tiykarında, ulıwma bahası 13 milliard 500 million bolǵan mekteptiń qurılıs jumısları juwmaqlanıp, jańa mektep paydalanıwǵa tapsırıldı,-deydi mektep direktorı Gúlnara Allambergenova.- 330 orınǵa mólsherlengen bul bilimlendiriw dárgayında oqıwshılar hám pedagog-xızmetkerler ushın barlıq qolaylı sharayatlar jaratılǵan. Bunıń ushın húrmetli Prezidentimizge úlken raxmetler aytamız.
Saltanatlı máresimde 1-klassqa qádem qoyǵan balalarǵa Prezident sawǵaları tapsırılıp, dáslepki qońıraw dawısları astında jańa oqıw jılı baslandı.
Álbette, jańa mektep – gújimterekli jaslar ushın zamanagóy bilim alıw orayı hám keleshekke isenim menen qádem qoyıw maydanına aylanadı, dep oylaymız.

Adilbay Orazov,
Qaraqalpaqstan xabar agentligi sholıwshısı.