Ózbekstan Respublikası Prezidentiniń 2025-jıl 19-fevraldaǵı «2025-jıl ónimi paxta shiyki zatın mashinalarda terip alıwdı támiyinlew ilajları haqqında»ǵı qararı elimizde paxtashılıqtı rawajlandırıwǵa qaratılǵan áhmiyetli hújjet boldı desek aljaspaǵan bolamız.

Atap aytqanda, usı qarar talapları boyınsha, bıyılǵı jılı Qaraqalpaqstan Respublikasında aymaqlardıń awıl xojalıǵı texnikasına bolǵan zárúrliginen kelip shıǵıp, paxtashılıqqa qánigelesken klaster hám fermer xojalıqları ushın lizing tiykarında 60 dana zamanagóy paxta teriw kombaynların jetkerip beriw belgilengen.
Ózbekstan Respublikası Ǵárezsizliginiń 34 jıllıq bayramı múnásibeti menen «Ózagrolizing» akcionerlik jámiyetiniń Qaraqalpaqstan Respublikası filialında usı kombaynlardı saltanatlı túrde tapsırıw máresimi bolıp ótti.
Onda Qaraqalpaqstan Respublikası Joqarǵı Keńesiniń Awıl hám suw xojalıǵı máseleleri komiteti baslıǵı A.Jumanazarov sońǵı jılları elimizde Prezidentimizdiń basshılıǵında awıl xojalıǵında ámelge asırılıp atırǵan reformalardı keń túrde atap ótip, respublikamızǵa alıp kelingen bul jańa kombaynlar tek ǵana fermerler ushın emes, al, pútkil Qaraqalpaqstan xalqı ushın úlken áhmiyetke iye ekenligin hám ǵárezsizligimizdiń 34 jıllıǵına múnásip sawǵa bolǵanlıǵın ayrıqsha atap ótti.
Ilajda Túrkiya hám Qıtayda islep shıǵarılǵan zamanagóy kombaynlardıń giltleri fermer xojalıqlarına saltanatlı túrde tapsırıldı.
-Shımbay rayonı Baxıtlı awıl puqaralar jıyınında jaylasqan «Qudaybergen-Gúldana» fermer xojalıǵında mexanizator bolıp isleymen,-deydi Bahadır Omarov.-Xojalıǵımızǵa jańa texnikalar tapsırılıp atırǵanınan quwanıshlıman. Endi usı kombayn járdeminde xojalıǵımızda jetistirilgen zúráátti terip alıp, respublikamızdıń paxta qırmanına ózimizdiń úlesimizdi qosamız, dep xalqımızǵa wáde beremiz.
Álbette, respublikamızǵa alıp kelinip atırǵan bunday jańa kombaynlar paxta teriw processin ádewir tezlestirip, fermerlerdiń múshkilin jeńillestiredi. Bul bolsa, óz gezeginde, fermerlerdiń waqtın únemlep, dáramatın arttırıw hám Qaraqalpaqstan ekonomikasınıń rawajlanıwına xızmet etedi, dep isenemiz.

Adilbay Orazov,
Qaraqalpaqstan xabar agentligi sholıwshısı.