1-sentyabr – hár bir ózbekstanlı ushın ótmishten maqtanısh, keleshekke isenim hám Watanǵa mehir-muhabbat sezimi tolıp-tasqan kún. Bıyılǵı bayram mámlekettiń jańalanıw hám alǵa isenimli háreketi dáwirin sáwlelendiretuǵın “Watan ushın, millet ushın, xalıq ushın!” degen ómirsheń súren astında ótkerilmekte.

Bayram aldınan “Sociallıq pikir ” RJFOM sociologiyalıq soraw ótkerdi, soraw Ǵárezsizlik kúni puqaralar tárepinen milliy birlik hám keleshekke isenim belgisi sıpatında qabıl etetuǵının kórsetti.
Xalıqtıń ulıwma kópshiligi bayramdı ózgeshe sezim menen kútip aladı, sebebi 97 procent puqaralar mámleket ushın maqtanısh sezimin sezedi; 87,6% soralǵanlar bayram ruwxında, jaqsı keypiyattı atap ótti; 84,7% soraw qatnasıwshıları bul kúndi xalıqtıń awızbirshiligi menen baylanıstıradı; 95,5% xalıq Ózbekstan Respublikası puqarası ekenliginen maqtanadı.
Ǵárezsizlik tek ǵana tariyxıy waqıyaǵa emes, al jańa imkaniyatlar dáregine aylandı. 79,1% puqaralardıń atap ótiwinshe, sońǵı jılları olardıń óz potencialın júzege shıǵarıw hám turmıslıq maqsetlerge erisiw imkaniyatları sezilerli dárejede keńeydi.
Jámiyettiń sanasında mámleket kelesheginiń ilhamlandırıwshı kórinisi de bekkemlendi. Derlik barlıq respondentler Ózbekstandı kúshli hám abadan (97,8%), tınısh hám bekkem (88,9%), ruwxıy bay hám mádeniyatlı (85,3%), zamanagóy hám innovaciyalıq (81,9%) mámleket sıpatında kóredi.
Ótkerilgen izertlew Ǵárezsizlik kúni xalıq ushın milliy maqtanısh belgisi, kóterińkilik hám mámlekettiń jarqın keleshegine isenim dáregi bolǵanın anıq tastıyıqlaydı.

ÓzA