1-sentyabr kúni Qorǵanıw ministrligi joqarı áskeriy bilimlendiriw mákemelerine usı jılı oqıwǵa qabıl etilgen birinshi basqısh kursantlarınıń saltanatlı “Watanǵa ant” ilajları bolıp ótti.

Bul haqqında Qorǵanıw ministrligi Málimleme hám ǵalaba kommunikaciyalar departamenti xabar berdi.
Atap aytqanda, Ózbekstan Respublikası áskeriy qáwipsizlik hám qorǵanıw universitetinde usı mákemege jańadan qabıl etilgen kursantlar Watanǵa ant qabıl etti.
Saltanatlı ilajda qorǵanıw ministri general-leytenant Shuhrat Xolmuhamedov, Qorǵanıw ministrligi Jámiyetlik keńesiniń aǵzaları, áskeriy xızmetkerler, ata-analar hám kursantlar qatnastı. Shıǵıp sóylegenler kursantlardı ana Watandı qorǵawday maqtanıshlı kásipti iyelew jolındaǵı dáslepki qádemleri menen qutlıqladı.
Sonday-aq, Ózbekstan Respublikası Áskeriy qáwipsizlik hám qorǵanıw universitetiniń Qurǵaqlıqtaǵı áskerler institutında da kursantlar Watanǵa ant beriw ushın sap tarttı.
Sonıń menen birge, Áskeriy aviaciya institutı, Málimleme-kommunikaciya texnologiyaları hám baylanıs áskeriy institutı hám Áskeriy medicina institutında da “Watanǵa ant” saltanatları joqarı dárejede ótkerildi.
Institutlarda ótkerilgen máresimlerde keń jámiyetshilik wákilleri elimizde áskeriy xızmetkerler ushın jaratılıp atırǵan sharayatlar, olardı sociallıq qorǵaw jolındaǵı reformalar haqqında aytıp, hámmeniń oqıw hám aldaǵı xızmetlerine tabıslar tiledi.
Kursantlar mámleketimizdiń muqaddes nıshanı bolǵan bayraqtı súyip, ullı babalarımızdıń ruwxları, Watan aldındaǵı minnetin hadal orınlawǵa bel baylap, hújdanı, ar-namısı hám abırayın ortaǵa qoyıp, Ózbekstan Respublikasına, xalqına hám Prezidentine ómir boyı sadıq bolıwǵa, hár qanday mashaqatlı sınaq hám qıyınshılıqlarda da el-jurtınıń joqarı isenimin aqlawǵa jaqınları hám keń jámiyetshiliktiń gúwalıǵında saltanatlı túrde ant etti.

ÓzA