Tyanczin qalasında bolıp ótken Shanxay birge islesiw shólkemi sammitinde qatnasqan barlıq mámleket basshıları Qıtay Xalıq Respublikası Baslıǵı Si Czinpin tárepinen alǵa qoyılǵan Global basqarıw baslamasın qollap-quwatladı, dedi Shın mámleketi sırtqı isler ministri Van I.

– Bul baslama sammittiń eń áhmiyetli waqıyası boldı, – dedi lawazımlı shaxs baspasóz ánjumanında. – Ushırasıwda qatnasqan barlıq jetekshiler tárepinen qollap-quwatlanǵan bul qararǵa xalıqaralıq jámiyetshilik te áhmiyetli múnásibet bildirmekte.
ShBSh+ formatındaǵı keńeytilgen májiliste Si Czinpin xalıqaralıq huqıq normasına ámel etiw, kóp tárepleme principti qollap-quwatlaw, eki jaqlama standarttan waz keshiwdi názerde tutatuǵın global basqarıwda aymaǵı hám qudiretine qaramastan, barlıq mámleketler teń qatnasıwın támiyinleytuǵın, bes bántten ibarat joybardı alǵa qoydı.
Bizge belgili, 31-avgust – 1-sentyabr kúnleri Qıtaydıń Tyanczin qalasında bolıp ótken, ShBSh tariyxındaǵı eń iri ilaj sıpatında bahalanıp atırǵan gezektegi samitte 20 dan aslam sırt mámleket basshıları, sonıń ishinde, Ózbekstan Prezidenti Shavkat Mirziyoev ta qatnastı. Mámleketimiz basshısı ánjumanda, dástúrge muwapıq, global kólemde áhmiyetli bir qatar baslamalardı alǵa qoydı, dúnya jetekshileri menen ushırasıwlar ótkerdi. 2001-jılı shólkemlestirilgen bul xalıqaralıq shólkemge Hindstan, Iran, Qazaqstan, Qıtay, Qırǵızstan, Rossiya, Tájikstan, Pakistan, Ózbekstan hám Belarus kiredi. Awǵanstan hám Mongoliya baqlawshı, Sóylesiw boyınsha birge islesiwshi mámleketler: Ázerbayjan, Armeniya, Bahreyn, Egipet, Kambodja, Qatar, Kuveyt, Maldiv atawları, Myanma, Nepal, Birlesken Arab Ámirlikleri, Saudiya Arabstanı, Túrkiya hám Shrilanka bolsa sóylesiw boyınsha birge islesiwshi mámleketler esaplanadı.

S.Rahimov, ÓzA