Qádirli perzentlerim!

Húrmetli ustaz hám tárbiyashılar!

Húrmetli ata-analar!

Bárinen burın, siz ázizlerdi elimizdegi 10 mıńnan aslam mekteplerde Ózbekstan ǵárezsizliginiń 34 jıllıq bayramına únles halda ótip atırǵan Bilimler kúni menen shın kewlimnen qızǵın qutlıqlayman.
Usı quwanıshlı áyyyamda «Birinshi qońıraw»lar jańlawı astında birinshi márte mektep bosaǵasına qádem qoyıp atırǵan 720 mıńnan aslam ul-qızlarımız hám aqlıqlarımızdı, olardıń ata –anaların ayrıqsha qutlıqlap, ózimniń jaqsı tileklerimdi bildiriwden júdá minnetdarman.
Sońǵı jılları pútkil elimiz sıyaqlı mekteplerimiz kórinisi pútkilley ózgerip, olar shın mánisinde Jańa Ózbekstan tımsalına aylanıp baratırǵanı bárshemizdi sheksiz quwandıradı. Sebebi mektep qánshelli abad hám Sebebi, mektep qanshelli abat hám jarqın bolsa, jámyietlik turmıs sonshelli abadan, ilimli hám mazmunlı bolatuǵınına gúman joq.
Usı mániste, elimizde tálim-tárbiya processleri barǵan sayın jetilistirilip atırǵanı, hár jılı kóplegen jańa oqıw orınları qurılıp atırǵanı, olardıń materiallıq-texnikalıq bazası bekkemlenip, mektep jumısı ulıwmaxalıqlıq háreketke aylanǵanı – sońǵı dáwirde erisken eń úlken jetiskenliklerimizden biri, desek, áyne haqıyqattı aytqan bolamız.
Shınında da, kózleri ilimge háwes hám tolqınlanıp jaynap turǵan sizdey kúsh-ǵayratlı jaslarımızǵa rawajlanıw hám jetilisiw, baxıt esiklerin ashıp beretuǵın muqaddes dárgay – mekteplerimizdiń rawajlanıwında biz xalqımız, milletimizdiń jarqın keleshegin kóremiz. Búgingi kúnde óz aldımızǵa qoyıp atırǵan úlken-úlken maqsetlerge erisiwdiń tiykarǵı faktorın, bas giltin, bárinen burın, bilimlendiriwde, mekteplerimizde, dep bilemiz.
Sońǵı jılları oqıwshı jaslarımız húrmetli ustaz hám tárbiyashıları menen birgelikte mine, usınday joqarı itibardı tereń sezinip, oqıwda, dóretiwshilikte, sportta, jámiyetlik jumıslarda áhmiyetli jeńislerdi qolǵa kirgizip atırǵanı bizge, álbette, qosımsha kúsh-ǵayrat, ilham hám isenim baǵıshlaydı.
Kóplegen mektep pitkeriwshileri elimizdegi abıraylı joqarı oqıw orınları menen birge sırt eldegi jetekshi universitetlerge joqarı ball menen oqıwǵa kirip atırǵanı, turmısta óziniń múnásip ornın tawıp, Jańa Ózbekstannıń rawajlanıwına úlken úles qosıp atırǵanı turmısımızda mekteptiń, ustaz-tárbiyashılardıń áhmiyeti jáne de artıp atırǵanın kórsetedi.
Siz, ázizler, áne usınday iygilikli dástúrlerdi múnásip dawam ettiresiz hám joqarı basqıshqa kóteresiz, dep isenemen.
Hesh qashan umıtpań, mektep – bul ájayıbat, kitap, ustazlar ótetuǵın hár bir sabaq – sheksiz ǵáziyne.
Aldıńızǵa anıq maqset qoyıp, bar kúsh-ǵayratıńız, bilim hám qábiletińiz benen háreket etseńiz, gózlegen sheklerge álbette jetesiz.
Bul jolda sizlerge saw-salamatlıq, tabıs hám jeńisler tileymen.
Jańa oqıw jılı bársheńizge múbárek bolsın!

Shavkat Mirziyoev,
Ózbekstan Respublikası Prezidenti