Bilimlendiriw — bul jámiyetti rawajlandırıwdıń eń tiykarǵı baǵdarı, xalqımızdı joqarı sheklerge jetkeriwshi eń qúdiretli kúsh bolıp tabıladı.

Sońǵı jılları bilimlendiriw tarawında ámelge asırılıp atırǵan reformalar mámleketimizdiń erteńgi aydın keleshegin jaratıwǵa bekkem tiykar bolıp xızmet etpekte.
Búgingi kúni mektep hám joqarı oqıw orınlarına óziniń dáslepki qádemlerin taslap atırǵan oqıwshı hám studentlerdiń júzlerinde erteńgi kúnimizdi, xalqımızdıń ullı arzıw-niyetleri, Watanımızdıń jarqın keleshegin kóremiz.
Sonlıqtan bilimlendiriw dárgaylarında oqıp atırǵan jaslarımızdı ilimge baǵdarlaw, olardıń kewillerinde iygilikli maqsetlerdi oyatıw, Watanǵa sadıqlıq hám pidayılıq tuyǵıların bekkemlew búgingi kúni hámmemiz ushın dańqlı, áyne payıtta oǵada juwapkerli wazıypa bolıp tabıladı.
Nókis qalasındaǵı 1-sanlı qánigelestirilgen mektep-internatında «2-sentyabr — Bilimler kúni» múnásibeti menen bayram keshesi bolıp ótti.
Onda Qaraqalpaqstan Respublikası Ministrler Keńesiniń Baslıǵı Farhad Ermanov shıǵıp sóylep, mektep jámáátin Ózbekstan Respublikası Ǵárezsizliginiń 34 jıllıǵı, 2-sentyabr —Bilimler kúni bayramı menen respublika húkimeti atınan qızǵın qutlıqladı hám sońǵı jılları mámleketimizde Prezidentimizdiń basshılıǵında bilimlendiriw tarawına qaratılıp atırǵan joqarı itibar hám qollap-quwatlawdı keń túrde atap ótti. Sonıń ishinde húrmetli Jurtbasshımızdıń Qaraqalpaqstanǵa degen itibarı hám ǵamqorlıǵınıń nátiyjesinde ámelge asırılıp atırǵan iygilikli islerdi, qaraqalpaqstanlı oqıwshılardıń respublikalıq hám xalıqaralıq olimpiadalarda qolǵa kirgizip atırǵan tabısların ayrıqsha tilge aldı.
Bayram keshesinde bilimlendiriw tarawında ámelge asırılıp atırǵan reformalardı júzege asırıwda ózleriniń pidayılıqların kórsetip, oqıwshıları joqarı nátiyjelerdi qolǵa kirgizip kiyatırǵan bir qatar tájiriybeli muǵallimlerge Húrmet jarlıqları hám estelik sawǵalar tapsırıldı.
-Bıyılǵı oqıw jılında mektebimizge anıq hám tábiyǵıy pánler baǵdarı boyınsha 120 oqıwshı qabıllandı,-deydi usı mektep direktorı Marat Ibrayımov.-Mektebimizde oqıwshılardıń zaman talabına say tálim alıwı ushın barlıq qolaylı sharayatlar jaratılǵan. Atap aytqanda, mektebimizde alıs rayonlardan kelgen oqıwshılardıń sapalı bilim alıwı hám jasawı ushın arnawlı jataqxana shólkemlestirilgen. Sonıń menen birge, oqıwshılardıń sabaqtan bos waqıtların mazmunlı ótkeriwi ushın qosımsha pán dógerekleri, sport sekciyaları islep tur. Bul álbette, oqıwshılarımızdıń ózleri qızıqqan pánler boyınsha ozıq oylı, tereń bilimge iye jaslar bolıp jetilisiwine ayrıqsha xızmet atqaradı.
Ilaj mekteptiń talantlı oqıwshıları tárepinen tayarlanǵan koncert baǵdarlaması menen dawam etti.
Sońınan mektepte «Dáslepki qońıraw» qaǵılıp, oqıwshılar jańa oqıw jılın baslap jiberdi.

Adilbay Orazov,
Qaraqalpaqstan xabar agentligi sholıwshısı