Múnásibet

Prezidentimizdiń basshılıǵında sońǵı jıllarda ámelge asırılıp atırǵan keń kólemli reformalar insan máplerin, xalqımızdıń abadan turmısın támiyinlew, demokratiyalıq qádiriyatlardı bekkemlewge qaratılǵanı menen áhmiyetli bolıp esaplanadı. Jámiyette ádillik hám nızamlılıq ústin bolıwı, hár bir insannıń huqıqları menen erkinlikleriniń kepilleniwi búgingi reformalardıń tiykarǵı baǵdarın belgilep bermekte.
Ǵárezsizlik jılları dawamında elimizde insan huqıqları menen erkinliklerin támiyinlew, puqaralardıń múnásip turmıs keshiriwi ushın barlıq sharayatlardı jaratıw mámleketlik siyasat dárejesine kóterildi. Bul baǵdarda nızam ústinligi, insanıylıq, demokratiya principleri izbe-iz turmısqa engizilip, xalqımızdıń mámleketke bolǵan isenimi barǵan sayın bekkemlenbekte.
Usı mániste, Ózbekstan Respublikası Prezidenti Sh.Mirziyoev tárepinen Ǵárezsizligimizdiń 34 jıllıq bayramı qarsańında qol qoyılǵan “Jaza múddetin ótep atırǵan, qılmısına shın kewilden pushayman bolǵan hám dúzeliw jolına isenimli ótken bir topar shaxslardı ápiw etiw haqqında”ǵı párman elimizde alıp barılıp atırǵan insanıylıq siyasatınıń ámeliy kórinisi boldı.
Usı párman menen 523 shaxs ápiw etildi. Bul qarar tek ǵana ayıbın túsinip, jańadan durıs turmısqa qádem qoyıwǵa umtılǵan shaxslar ushın emes, al olardıń shańaraq aǵzaları, perzentleri ushın da úmit hám quwanısh baǵıshladı. Prezidentimizdiń bunday iygilikli baslamaları adamgershilik, keshirimlilik hám elimizde ámel etip atırǵan ádil mámleketlik siyasattıń tımsalı sıpatında áhmiyetke iye.
Ápiw etiw – bul jınayattı aqlaw emes, al islegen qátesin ańlap, dúzeliw jolına kirgen shaxslarǵa ekinshi imkaniyat beriw demek. Bul process jámiyetimizde keńpeyillik, miyrim-shápáát hám keshirimlilik sıyaqlı joqarı insanıylıq pazıyletlerdi bunnan bılay da joqarılatıwǵa xızmet etedi. Sonıń menen birge, ápiw etilgen puqaralardıń jámiyetke qaytıwı, múnásip turmıs keshiriw hám elimizdiń rawajlanıwına óz úlesin qosıwı ushın jańa imkaniyat esigin ashadı.
Pármannıń áhmiyetli tárepi sonda, ol insan táǵdirine baylanıslı máselelerde mámlekettiń qanshelli miyrim-shápáátli hám adamgershilikli kózqaraslarǵa súyenip atırǵanın ayqın kórsetedi. Ápiw etilgen shaxslar ushın jınayat jolında emes, al hadal miynet etiw, bilim alıw hám iygilikli isler menen shuǵıllanıwdıń jáne bir imkaniyatı jaratılmaqta. Bul bolsa, bárshemizge úlken sabaq – ómirde durıs joldan barıw, islegen qáteliklerimizden durıs juwmaq shıǵarıw zárúrligin kѳrsetedi.
Juwmaqlap aytatuǵın bolsaq, ǵárezsizlik – bul xalqımız ushın tek ǵana tariyxıy jetiskenlik emes, al insanıylıq hám ádillikke tiykarlanǵan demokratiyalıq mámleket qurıw imkaniyatı bolıp esaplanadı. Prezidentimiz tárepinen qol qoyılǵan bul ápiw etiw pármanı búgingi kúnde mámleketimizde bolıp atırǵan reformalardıń insan máplerine xızmet etip atırǵanın ayqın dálilledi.
523 insannıń táǵdirine nur hám úmit kirgizgen bul párman tek ǵana olardıń turmısında emes, al pútkil jámiyetimizde de jańa ruwxıy ortalıq jaratıwǵa xızmet etedi. Sebebi, keshirimlilik hám ekinshi imkaniyat beriw – hár qanday jámiyettiń ruwxıy joqarılıǵınan derek beredi.

Polat Reymov,
Qaraqalpaqstan Respublikası Joqarǵı Keńesiniń deputatı.
Qaraqalpaqstan xabar agentligi