Mámleketimiz ǵárezsizliginiń 34 jıllıǵı múnásibeti menen “Jańa Ózbekstan” baǵında bayram saltanatı bolıp ótti.
Milliy ózlik, ruwxıy qádiriyatlar hám shın mánisinde insan táǵdirine húrmetti sáwlelendiretuǵın reformalardıń artında ǵárezsizlik túsinigi sáwlelenedi.

“Watan ushın, millet ushın, xalıq ushın!” súreniniń mánisi de áyne, usı maqsetlerdi ózinde jámlegeni menen ajıralıp turadı. Búgin Watan ushın er hám hayal, millet ushın kekse hám jas, xalıq ushın basshıdan xızmetkerge shekem sadıqlıq penen xızmet etetuǵın kúnler keldi.
Hár bir aymaqtıń hár qarıs jerin jasıllıqqa bólew, ana topıraqqa mehir menen qatnasta bolıw, tamshılarǵa baǵlardı jaylastırıw maqsetleri kewillerge sińip barmaqta. Sol arqalı Ǵárezsizlik el birligi menen jáne de kórkem túrge enip atırǵanınıń gúwası bolamız.
Prezident Shavkat Mirziyoev pútkil xalqımızdı, sırt eldegi watanlaslarımızdı mámleketimiz ǵárezsizliginiń 34 jıllıq dańqlı sánesi menen qutlıqladı.
– Búgin, mine usı ullı áyyyam kúnlerinde hámmemiz bir turmıslıq haqıyqattı tereń sezinbektemiz. Jańa Ózbekstan ideyası tiykarında baslaǵan úlken reformalarımız sebepli ǵárezsizlik bergen huqıq hám erkinliklerdi hár bir watanlasımız óz turmısında tereń sezinip, bul imkaniyatlardan keńnen paydalanbaqta. Áne, usı ullı ideya tiykarında biz úsh mıń jıllıq bay tariyxımız hám mádeniyatımızdı qayta ańladıq. Elimiz jerindegi Birinshi hám Ekinshi Renessans dástúrlerin rawajlandırıp, Úshinshi Renessansqa qaray isenimli ámeliy qádemler taslamaqtamız.
Bul jolda Jańa Ózbekstan mámleketi, Jańa Ózbekstan jámiyeti ullı tariyxımızdı jańa – jáne de joqarı Oyanıw dáwiri menen baylanıstıratuǵın bekkem kópir bolıp xızmet etetuǵınına isenemen, – dedi mámleketimiz basshısı.
Ǵárezsizlik, bárinen burın, kúshli ekonomika menen bekkem. Usı mánide, Prezidentimizdiń shıǵıp sóylegen sózinde kóplegen áhmiyetli nátiyjeler aytıp ótildi.
Dúnyadaǵı qıyın jaǵdayǵa qaramastan, mámleketimiz ekonomikası 6 procentten joqarı pátlerde turaqlı óspekte. Keyingi segiz jılda jalpı ishki ónim 2 esege artıp, ótken jılı 115 milliard dollarǵa, eksport kólemi 26 milliard dollarǵa jetken. Jıl juwmaǵı menen jalpı ishki ónimimiz 130 milliard dollar bolıwı kútilmekte. Mámleketimizdiń altın-valyuta rezervleri birinshi márte 48 milliard dollardan asqan. Keyingi segiz jılda elimizge derlik 130 milliard dollar sırt el investiciyaları kirip kelgen.
Xalqımızdıń kóz aldında mıńlaǵan zamanagóy kárxanalar, sociallıq-ekonomikalıq infrastruktura obektleri boy tiklemekte. Usı jılı jámi 35 milliard dollar investiciya esabınan 9 mıńǵa shamalas jańa kárxana, xızmet kórsetiw kompleksleri qurıladı.
Ótken dáwirde tek ǵana kishi hám orta isbilermenlerdiń sanı 2 esege kóbeygen. Búgin bul tarmaqta 10 millionnan aslam xalıq miynet etip, dáramat tappaqta.
Jıl basınan berli 5 million xalıqtıń bántligi támiyinlendi. Usı jıldıń ózinde sırt elde jumıs islep atırǵan 700 mıń puqara elimizge, óz shańaraǵı qushaǵına qayttı.
Ózbekstan dúnyaǵa keńnen ashılǵanınıń nátiyjesinde sırt el turistleriniń sanı ótken jılı 10 million adamnan, turizm xızmetleriniń eksportı bolsa 3 milliard dollardan arttı.
Ekonomikanıń rawajlanıwı, xalıqtıń kóbeyiwi menen qáwipsiz hám turaqlı energiya resurslarına talap artpaqta. Sonıń ushın “jasıl” energiya úlesin arttırıw boyınsha misli kórilmegen qádemler qoyıldı.
Nátiyjede elektr islep shıǵarıw quwatlılıqları 2016-jıldaǵı 59 milliard kilovatt-saattan 85 milliard kilovatt-saatqa jetti, kelesi jılı bul 97 milliard kilovatt-saattan aslamdı quraydı.
Usı jıldıń ózinde 6,5 milliard kilovatt-saat “jasıl” energiya islep shıǵarıldı. Eń áhmiyetlisi, jámi generaciya quwatlıqlarında “jasıl” energiyanıń úlesi 30 procentke jetti. 2030-jılǵa shekem jáne 35 milliard dollar tikkeley investiciya esabınan “jasıl” energiyanıń úlesin 54 procentke alıp shıǵıw rejelestirilgen.
Sociallıq tarawlar da rawajlandırılıp, xalıqtıń turmıs sharayatları jaqsılanbaqta. Keyingi segiz jılda elimizde derlik 12 mıń kóp qabatlı turaq jay qurıldı. Usı jılı “Jańa Ózbekstan” hám basqa da massivlerde jáne mıń kvartiralı zamanagóy turaq jaylar qurılıp, xalıqqa tapsırıladı.
Sociallıq qorǵaw siyasatı mútáj insanlarǵa mádet bolmaqta. “Birge islesiw baǵdarlaması”na muwapıq, ata-ana mehrinen ayırılǵan 11 mıń balanıń bilimlendiriw, kásip-óner, sport sistemasına qamtıp alınǵanı áhmiyetli nátiyje boldı. Járdemge mútáj shańaraqlardıń 2,5 millionnan aslam aǵzalarına 110 túrdegi járdem hám xızmetler kórsetiw jolǵa qoyıldı.Bulardıń barlıǵı óz nátiyjesin berip, elimizde kámbaǵallıq dárejesi 6,8 procentke tústi.
Sapalı bilimlendiriw hám xalıqtıń salamatlıǵı – keleshektegi rawajlanıwdı sheshiwshi eń áhmiyetli másele. Usı maqsette keyingi segiz jılda jeke menshik sektor menen birgelikte baqshalardaǵı orınlardıń sanı 2,5 millionǵa, qamtıp alıwı bolsa 78 procentke jetkerildi. Mekteplerde qosımsha 1 million oqıwshı ornı jaratıldı. Joqarı bilimlendiriwde qamtıp alıw 9 procentten 42 procentke arttı.
Keyingi jılları medicina ushın ajıratılıp atırǵan qarjılar 6 esege arttırıldı, sapalı medicinalıq xızmetler máhállege shekem túsirildi. Joqarı texnologiyalıq ámeliyatlardıń 400 den aslamı wálayat hám rayonlardıń ózinde ámelge asırılmaqta. Xalıqtıń turmıs sharayatlarınıń jaqsılanıp barıwı nátiyjesinde ortasha ómir súriw dárejesi 73,8 jastan 75,1 jasqa sozılǵanı atap ótildi.
Mámleketimiz ul-qızları sanaat, ilim, mádeniyat hám sportta úlken jetiskenliklerge erisip atırǵanı atap ótildi. Olardı tán alıp, Prezidentimiz pútkil Ózbekstan jaslarına qarata bılay dedi:
“Áziz perzentlerim, bárqulla este saqlań: baxıt – umtılǵandiki, jeńis – gúreskendiki! Keleshekti mártler, tariyxtı jeńimpazlar jaratadı. Bárqulla alǵa qaray umtılıń, bahadır ullarım, aqıllı qızlarım! Sizlerdiń iygilikli islerińizde Watan, xalıq, Prezident bársheńizge hámiyshe isenimli tayanısh hám súyenish boladı!”.
Mámleketimiz basshısı óziniń shıǵıp sóylegen sózinde geosiyasiy jaǵdayǵa da toqtap ótti. Ózbekstannıń hawazı regionallıq hám xalıqaralıq maydanda barǵan sayın bálent jańlap atırǵanı, elimizde kóplegen abıraylı sammitler ótip atırǵanı atap ótildi. Usı jerde Ózbekstannıń sırtqı siyasat baǵdarındaǵı poziciyası jáne bir márte atap ótildi.
Prezidentimiz bayramda qatnasıp atırǵan sırt mámleketlerdiń elshilerin, xalıqaralıq shólkemlerdiń wákillerin qızǵın qutlıqlap, nátiyjeli birge islesiw ushın minnetdarshılıq bildirdi.
Sóziniń juwmaǵında Shavkat Mirziyoev elimizdegi ózgerisler dawam ettiriletuǵının atap ótip, xalqımızdı birlikke hám pidayılıqqa shaqırdı.
– Biz hámmemiz bir xalıq, bir mámleket, bir shańaraqpız! Hámmemizdiń táǵdirimiz, keleshegimiz, baxıtımız hám tabısımız da birden-bir hám ulıwmalıq. Hár bir watanlasımız turmıstıń ózi aldımızǵa qoyıp atırǵan ótkir talaplardı tereń túsinip, janajan Watanımızdıń rawajlanıwı jolında shın kewilden xızmet etedi, dep isenemen, – dedi Prezident.
Bunnan soń bayram saltanatı úlken koncert baǵdarlaması menen dawam etti. Nama-qosıqlarda xalqımızdıń bay kórkem óneri hám qádiriyatları, búgingi shúkirshilik sezimi hám keleshektegi arzıw-niyetleri sáwlelendirildi.

Ziyodulla JONIBEKOV,
ÓzAnıń xabarshısı