Keyingi jılları mámleketimizde agrar tarawdı rawajlandırıw, atap aytqanda, sharwashılıq tarmaǵın qollap-quwatlawǵa baylanıslı sistemalı reformalardıń ámelge asırılıp atırǵanı nátiyjesinde aymaqlarda tarawdıń ekonomikalıq potencialı keńeymekte. Qaraqalpaqstanda da bul baǵdarda keń kólemli jumıslar ámelge asırılmaqta. Prezidentimizdiń baslamasına tiykarlanıp sharwashılıqtı qollap-quwatlaw hám oǵan baylanıslı tarmaqlardı rawajlandırıw boyınsha bir qatar ilajlar belgilengen.

Usı jılı qabıl etilgen PQ-57-sanlı qarar sheńberinde Beruniy rayonında “Beruniy-Agro Star” juwapkershiligi sheklengen jámiyetiniń jumısı jolǵa qoyıldı. Bul kárxana tárepinen sharwa ot-jemleriniń rezervlerin jaratıw, bul baǵdarda jańa agrar joybarlardı ámelge asırıw boyınsha jumıslar alıp barılmaqta. Bul baslamalar aymaqta sharwashılıqtı rawajlandırıwǵa xızmet etpekte.
Beruniy rayonındaǵı “Yuldashev Karimboy” fermer xojalıǵında ámeliy jumıslardıń nátiyjesi sıpatında 11,5 gektar jer maydanında “Yupiter” atlı gibrid júweri sortın jetistiriw jumısları jolǵa qoyıldı. Bul joybar úsh tárepleme shártnama tiykarında ámelge asırılǵan bolıp, diyqan xojalıǵı ushın da ekonomikalıq payda keltirmekte. Joqarı ónimdarlıqqa iye bolıp, 50 centnerden zúráát bergen.
Házirgi waqıtta zúráátti joqarı sapalı kombaynlar járdeminde jıynap alıw jumısları baslanǵan. Eń áhmiyetlisi, qısqı máwsim ushın sharwa ot-jeminiń tiykarǵı dáregi esaplanǵan silos transheyalarda saqlanbaqta. Bul bolsa aymaqta sharwashılıq jumısın turaqlı dawam ettiriwge tiykar jaratadı.
Sharwa ot-jemin jetistiriwge qaratılǵan bunday joybarlar tarawdı modernizaciyalaw, awıl xojalıǵında nátiyjelilikti arttırıw hám xalıqtıń bántligin támiyinlewde áhmiyetli orın iyeleydi.

Qaraqalpaqstan xabar agentligi