Mámleketimizde gaz támiynatı sistemasın sanlastırıw hám zamanagóy texnologiyalar tiykarında nátiyjeliligin arttırıw máselesi úlken áhmiyetke iye bolmaqta.

Usı kózqarastan, “Hududgaztaminot” AJda Birlesken Arab Ámirlikleriniń “Esyasoft Holding” kompaniyasınıń wákilleri menen ushırasıw ótkerildi.
Ushırasıwda investiciya hám sanlı sheshimlerdi engiziw boyınsha birge islesiw imkaniyatları dodalandı. Tiykarǵı itibar gaz bólistiriw hám tutınıw sistemasındaǵı shıǵınlardı azaytıw hám operaciyalardıń nátiyjeliligin arttırıwǵa qaratıldı.
Ushırasıwda atap ótilgenindey, “Esyasoft Holding” kompaniyası jasalma intellekt tiykarındaǵı sanlı sheshimlerdi energetika hám kommunallıq xojalıq infrastrukturasına, elektr hám gaz bólistiriw tarmaqlarına keńnen engizip kiyatırǵan iri kompaniyalardan biri bolıp esaplanadı.
Kompaniya Ózbekstanda ámelge asırılatuǵın joybarlarǵa investiciya kirgiziwdi rejelestirmekte. Dáslepki basqıshta “Hududgaztaminot” AJ sistemasında “Tábiyǵıy gazden paydalanıwdı basqarıwdıń sanlı sistemasın engiziw” joybarı tanıstırıldı. Joybar respublika boyınsha tábiyǵıy gazdiń bólistiriliwi hám tutınıwın anıq esapqa alıw, sonday-aq, shıǵınlardı sezilerli azaytıw imkaniyatın beredi. Joybar sheńberinde orta basımlı qubırlar zamanagóy esaplaw úskeneleri menen támiyinlenedi hám gaz bólistiriw tarmaqlarınıń elektron kartası jaratıladı.
Kompaniya esap-sanaqlarına bola, joybardıń ámelge asırılıwı nátiyjesinde kommerciyalıq hám texnikalıq shıǵınlar 70-80 procentke azayıwı, gaz esabında 99,8 procent anıqlıqqa erisiliwi, sistemanıń operaciyalıq qárejetleri 25 procentke qısqarıwı hám avariyalıq jaǵdaylarda operativ ilajlar kóriw tezligi 60 procentke artıwı názerde tutılǵan.
Sóylesiwler juwmaǵında tárepler usınıs etilgen texnologiyalıq sheshimlerdi sınaqtan ótkeriw hám joybar boyınsha texnikalıq-ekonomikalıq tiykar islep shıǵıw maqsetinde birgeliktegi jumısshı topar dúziwge kelisip aldı.

ÓzA