Haqıyqatında da, búgingi kúnde xalıq, atap aytqanda, saylawshılar menen turaqlı pikirlesiw, olardı oylandırıp atırǵan mashqalalardı sheshiw deputatlardıń saylaw okruglerindegi jumısınıń tiykarǵı baǵdarına aylandı. Házir olar hár aydıń aqırǵı háptesinde xalıq penen pikirlesip, bar mashqalalarǵa sheshim izlemekte.

Usı kózqarastan, bunnan bılay tek ǵana bar mashqala hám kemshiliklerdi úyreniwimiz emes, al jámiyetlik turmıstıń áhmiyetli tarawlarındaǵı sheshiliwi kerek bolǵan máselelerge xalıqtıń pikiri hám máplerin esapqa alıwımız, adamlardı razı etiw jolında jáne de kóbirek miynet etiwimiz, eń áhmiyetlisi, xalqımızdıń isenimin aqlawımız zárúr.
Prezidentimizdiń “Deputatqa isenim – xalıqqa isenim” degen sózleri deputatlardıń abırayın arttırıp, olardıń xalıq arasında ayrıqsha ornı bar ekenligin kórsetip berdi. Endi deputat palatada otırıp emes, xalıq arasında júrip, ózi belgilep bergen jol kartası tiykarında jumıs islemekte.
Nızamshılıq palatasınıń deputatı Gúljan Xalmuratova da Xojeli rayonında bolıp, saylawshılardıń mashqala hám usınısların, pikirlerin tıńlaw maqsetinde rayondaǵı Tınıshlıq mákan puqaralar jıyınında aymaq turǵınları menen ushırastı.
– Máhállemizde 3 mıńnan aslam adam jasaydı,-deydi Tınıshlıq MPJ baslıǵı Q.Reymov. – Máhállemiz sharwashılıq, qusshılıq hám xızmet kórsetiwge baǵdarlanǵan.
Máhállemizge 16 kóshe kiretuǵın bolsa, sonnan Olimpiada hám Paraxatshılıq kósheleriniń suw qubırları 1976-jılı tartılǵan. Mine 49 jıldan berli suw qubırları gónergenligi sebepli házirgi kúnde Olimpiada kóshesiniń 48 shańaraq 500 metr hám Paraxatshılıq kóshesiniń 54 shańaraq 1 km. suw qubırların jańadan tartıw kerek. Búgin xalıq wákili máhállemizge kelip, usı mashqalanı ornında úyrenip, puqaralar menen de sóylesip, múrájattı hár tárepleme úyrenip shıqtı. Rayondaǵı tiyisli shólkem wákilleri menen de sóylesip, deputat tárepinen mashqala qadaǵalawǵa alındı hám saplastırıwǵa kelisip alındı.
Xalıq wákili rayondaǵı 6-sanlı mektepte de boldı. Usı mekteptegi bıyılǵı oqıw jılına tayarlıq jumısları hám jumısı menen jaqınnan tanıstı. Bul mektepte 1 mıń 114 oqıwshıǵa 98 tájiriybeli pedagog muǵallimler sabaq beredi. Bıyılǵı oqıw jılına da sanawlı kúnler qaldı. Házirgi kúnde oqıw jılına tayarlıq jumısları alıp barılmaqta. Prezidentimizdiń baslaması menen “Kásipke úyretiw” tártibine muwapıq mektepte oqıwshılar ushın kompyuterde programmalastırıw, gúl ósiriw, qosıq aytıw, toqımashılıq, shet tillerin úyreniw, robototexnika, tigiwshilik, kórkem dóretiwshilik, zakovat klubı sıyaqlı baǵdarlar boyınsha da jumıs alıp barmaqta.
Xalıq wákili usı mekteptiń jumısı menen jaqınnan tanısıp, keleshegimizdiń miyrasxorların tárbiyalawda bilim beriwde oqıwshı pedagog ustazlardıń miyneti úlken ekenligin atap ótip, olardı jaqınlasıp kiyatırǵan ǵárezsizligimizdiń 34 jıllıq bayramı menen qutlıqlap, ustazlardıń pikir-usınısların tıńladı.

Qaraqalpaqstan xabar agentligi