Azıq-awqat qáwipsizligin zamanagóy basqarıw boyınsha tájiriybe almasıw maqsetinde 25-28-avgust kúnleri tiyisli ministrlikler hám uyımlardıń wákillerinen ibarat Ózbekstan Respublikası delegaciyası Ázerbayjanǵa bardı. Sapar BMShtıń Azıq-awqat hám awıl xojalıǵı shólkemi (FAO) niń Ózbekstandaǵı wákilxanasınıń járdeminde shólkemlestirildi.

Ózbekstan Respublikası Densawlıqtı saqlaw ministrligi janındaǵı Sanitariyalıq-epidemiologiyalıq tınıshlıq hám jámiyet salamatlıǵı komiteti baslıǵınıń birinshi orınbasarı Nurmat Atabekov basshılıǵındaǵı delegaciya 25-avgust kúni Ázerbayjan Azıq-awqat ónimleri qáwipsizligi agentliginde (AFSA) qabıl etildi. Ushırasıw dawamında tárepler birge islesiw perspektivaların dodaladı hám azıq-awqat ónimleriniń qáwipsizligi, ósimliklerdi qorǵaw hám veterinariya tarawlarında tájiriybe almasıldı.
AFSA baslıǵınıń orınbasarı Zakiya Mustafaevanıń atap ótiwinshe, sońǵı jılları Ázerbayjan hám Ózbekstan arasındaǵı qatnasıqlar óz-ara sapar etiwler, qol qoyılǵan kelisimler hám birgeliktegi baslamalar arqalı izbe-iz rawajlanbaqta.
Ózbekstan delegaciyasına Ázerbayjanda azıq-awqat qáwipsizligi nızamshılıǵın jetilistiriw, qáwip-qáterlerge tiykarlanǵan tekseriw mexanizmleri, krizisli jaǵdaylardı basqarıw sistemaları hám operativ eskertiw mexanizmleriniń engiziliwi haqqında tolıq maǵlıwmat berildi. Prezentaciyalarda, sonday-aq, qadaǵalaw hám tekseriw tártip-qaǵıydaları, sonıń ishinde, HACCP (Qáwiplerdi tallaw hám qadaǵalawdıń áhmiyetli orınları) sistemasınıń qollanılıwı, azıq-awqat ónimlerin import hám eksport etiw talapları, jańa ónim túrleri, azıq-awqat qosımshaları, pesticidler, veterinariya dári quralları hám azıq-awqat qosımshaların dizimnen ótkeriw tártibi, milliy sanlı sistema – AQTIS (Azıq-awqat qáwipsizligi avtomatlastırılǵan málimleme sisteması) jumısı, jámiyetshilik penen pikirlesiw, ǵalaba xabar qurallarınan paydalanıw hám málimleme materialların tayarlaw sıyaqlı máselelerge ayrıqsha itibar qaratıldı.
Sapar dawamında Ázerbayjan Azıq-awqat qáwipsizligi institutında (AFSA) ushırasıw, sonday-aq, shegara qadaǵalaw punktleri hám laboratoriyalarǵa saparlar bolıp ótti. Bul process ózbekstanlı qánigelerge azıq-awqat importı hám eksportın qadaǵalawda “bir ayna” modeliniń ámeliyatın úyreniw imkaniyatın berdi. Bul oqıw saparı Ózbekstanǵa institutlardı reformalaw, laboratoriyalardı bekkemlew hám mápdar táreplerdi azıq-awqat qáwipsizligi tarawına keńirek tartıw boyınsha tájiriybelerdi úyreniw imkaniyatın berdi.
Delegaciya quramında Densawlıqtı saqlaw, Awıl xojalıǵı ministrlikleri, Veterinariya komiteti, Ósimlikler karantini hám onı qorǵaw agentligi, Mámleketlik bajıxana komiteti, Esap palatası hám Prezident janındaǵı Strategiyalıq reformalar agentliginiń basshı xızmetkerleri qatnastı. Bul baslama FAO tárepinen Ózbekstanda azıq-awqat ónimleri qáwipsizligin basqarıwdı kúsheytiw hám sawdanı jeńilletiw baǵdarındaǵı úzliksiz qollap-quwatlawdıń logikalıq dawamı bolıp esaplanadı.
Ázerbayjan tájiriybesin úyreniw arqalı Ózbekstan tutınıwshılardı qorǵaw, qáwipsiz hám sapalı azıq-awqat ónimlerine iye bolıw imkaniyatın jaratıw, sonday-aq, xalıqaralıq bazarda básekige shıdamlılıqtı arttırıw jolında áhmiyetli qádem taslamaqta.

M.Pirmatova,
ÓzA