Qaraqalpaqstan Respublikası Mektepke shekemgi hám mektep bilimlendiriwi ministrliginde «2025-2026-oqıw jılına tayarlıq hám bilimlendiriw tarawında alıp barılıp atırǵan reformalar» atamasında baspasóz konferenciyası ótkerildi.

Onda Qaraqalpaqstan Respublikası Mektepke shekemgi hám mektep bilimlendiriwi ministri G.Qojabaeva, ministrdiń birinshi orınbasarı A.Dauletbaev, ministrdiń orınbasarı M.Shlımbetova, ministrliktiń bólim baslıqları, ǵalaba xabar quralları wákilleri qatnastı.
Ánjumanda Qaraqalpaqstan Respublikası Mektepke shekemgi hám mektep bilimlendiriwi ministri G.Qojabaeva bilimlendiriw tarawında alıp barılıp atırǵan reformalar boyınsha keń túrde maǵlıwmatlar berip, ótken oqıw jılında tarawda qolǵa kirgizilgen jetiskenlikler hám jol qoyılǵan qáte-kemshiliklerge ayrıqsha toqtap ótti. Atap aytqanda, ilajda respublikamızdıń bilimlendiriw sistemasındaǵı kórsetkishler, bilimlendiriwdiń sapasına engizilip atırǵan jańalıqlar, tarawdaǵı erisken jetiskenlikler hám xalıqaralıq nátiyjeler, 2025-2026-oqıw jılında alǵa qoyılǵan tiykarǵı wazıypalar boyınsha keń túrde sóz etildi.
Ótkerilgen ilaj dawamında jurnalistler tárepinen tarawǵa baylanıslı bir qatar sorawlar berilip, olarǵa ministrlik basshıları tárepinen juwap berildi.
Ánjumanda ashıq-aydınlıq hám birge islesiw ortalıǵın támiyinlewge ayrıqsha itibar qaratılıp, bul bolsa bilimlendiriw tarawında alıp barılıp atırǵan reformalardıń keń jámiyetshilik ushın jáne de ashıqlıq principi tiykarında ámelge asırılıwına xızmet etedi.

Adilbay Orazov,
Qaraqalpaqstan xabar agentligi