Ózbekstan fermerleri keńesiniń baslıǵı Aktam Xaitov Avstriya Fermerler awqamınıń prezidenti, sonday-aq, Avstriya Milliy keńesiniń Awıl xojalıǵı máseleleri boyınsha komitetiniń baslıǵı G.Strasser basshılıǵındaǵı delegaciyanı qabılladı.

Ushırasıwda tárepler mámleketimizde agrar tarawdı rawajlandırıw boyınsha ámelge asırılıp atırǵan reformalar, fermer, diyqan xojalıqları hám kooperativlerdi qollap-quwatlaw boyınsha Keńes sistemasındaǵı shólkemlerdiń jumısı boyınsha pikir alıstı.
Ózbekstanda fermerlikti nátiyjeli shólkemlestiriw, agrotexnologiyalardı engiziw hám ónimniń ózine túser bahasın azaytıw baǵdarındaǵı háreketler ayrıqsha atap ótildi.
Ushırasıwda Avstriyanıń awıl xojalıǵı tarawında erisken jetiskenlikleri, fermerlik sisteması hám agro innovaciyalar baǵdarındaǵı tájiriybesi haqqında da sóz boldı.
Tárepler agrosanaat tarawındaǵı birge islesiwdi bunnan bılay da bekkemlew, tájiriybe hám innovaciyalıq qatnaslardı óz-ara úyreniw, Evropa regionında qollanılıp atırǵan aldınǵı texnologiyalardı elimiz sharayatına beyimlestiriw baǵdarında ámeliy ilajlar kóriwge kelisip aldı.
Keleshekte investiciyalıq joybarlar, oqıw-seminarlar, birgeliktegi izertlewler hám óz-ara delegaciyalar almasıwı arqalı eki mámleket arasındaǵı agrar birge islesiw jańa basqıshqa kóteriliwi kútilmekte.

ÓzA