Nókis qalasında “Yori-I” joybarı sheńberindegi “U-HOPE 2025” innovaciyalıq baǵdarlamasınıń start alıwına baǵıshlanǵan ilaj shólkemlestirildi. Onda “Biznesti rawajlandırıw banki” AKB Basqarması basshılıǵı, Qaraqalpaqstan Respublikası Ministrler Keńesi, Yaponiyanıń Yamagata universiteti professorları, Birlesken Milletler Shólkeminiń Rawajlanıw Baǵdarlaması (UNDP) juwapkerleri, jergilikli isbilermenler, mentorlar hám jámiyetshilik wákilleri qatnastı.

Bizge belgili, Ózbekstan Respublikası Prezidentiniń 2023-jıl 14-sentyabrdegi “Kishi biznesti rawajlandırıwdı finanslıq hám institucionallıq qollap-quwatlaw ilajları haqqında”ǵı qararına muwapıq, “Biznesti rawajlandırıw banki” AKB “Kishi biznesti úzliksiz qollap-quwatlaw” kompleksli baǵdarlamasın nátiyjeli ámelge asırıw hám onı turaqlı túrde jetilistirip barıw boyınsha tiykarǵı tayanısh bank sıpatında belgilengen.
Soǵan muwapıq, mámleketimiz basshısınıń baslaması tiykarında isbilermenlerdi oqıtıw procesine “Yaponiya tájiriybesi”n engiziw hám bul baǵdarda Yaponiyanıń jetekshi bilimlendiriw mákemeleri menen birge islesiwdi jolǵa qoyıwǵa ayrıqsha itibar qaratılmaqta. Atap aytqanda, bıyıl 27-yanvardaǵı Pármanda yaponiyalı qánigeler menen birgelikte Qaraqalpaqstanda jumıs alıp barıp atırǵan jas isbilermenler arasınan 50 mentordı tayarlaw wazıypası qoyılǵan.
«U-HOPE 2025” joybarı mine, usı basqıshtaǵı jumıslar rásmiy túrde baslanǵanın bildiredi.
Bul wazıypanıń orınlanıwı sheńberinde usı jılı Yamagata universitetiniń joqarı bahalanǵan isbilermenlikti oqıtıw baǵdarlaması (Yori-I)na tiykarlanǵan baǵdarlama tiykarındaǵı sabaqlar:
– Basqarıw boyınsha ámeliy nou-xaudı iyelew;
– Innovaciyalardı alǵa qoyıw;
– Jańa biznes jaratıwdı qollap-quwatlaw sıyaqlı baǵdarlarda alıp barıladı hám nátiyjede Qaraqalpaqstanda jáne 50 mentor tayarlanadı.
Baǵdarlama qatnasıwshılarda lekciyalar, seminarlar hám trenerlik arqalı mashqalalardı sheshiwdiń ámeliy kónlikpelerin rawajlandırıwǵa qaratılǵan bolıp, jergilikli isbilermenlik ortalıǵın jáne de janlandırıw, nátiyjede ekonomikalıq ósiwge alıp keletuǵın baslama ekeni menen itibarǵa ılayıq.
Jańa – “Yori-I joybarı sheńberindegi U-HOPE 2025” ashılıw máresiminde shıǵıp sóylegenler tárepinen bul joybardıń aymaqta jumıs orınların jaratıw, jergilikli ekonomikalıq rawajlanıwǵa erisiw hám isbilermenlikke aldınǵı tájiriybelerdi engiziw, aymaqtıń eksport potencialın jáne de arttırıwdaǵı ayrıqsha áhmiyetine toqtap ótti.
Mentorlar tayarlaw hám jergilikli isbilermenlerdi oqıtıw boyınsha “Biznesti rawajlandırıw banki” AKB hám Yamagata universiteti arasında dúzilgen birge islesiw kelisimi izbe-izlik penen, názerde tutılǵan múddetlerde tiykarǵı maqsetten awıspaǵan halda orınlanıp kiyatırǵanı atap ótildi.
Bul bolsa, elimizde isbilermenlik ortalıǵın jáne de jaqsılaw hám xalıqtıń bántlik dárejesin arttırıwǵa qosılıp atırǵan múnásip úles bolıp esaplanadı.
Sebebi, “Yori-I joybarı sheńberindegi U-HOPE 2025” joybarı sheńberindegi oqıwlar jedel baslandı hám bir neshe basqıshta bilim alǵan, sınaqlardan ótip mentorlıq talapların jaqsı orınlaǵan jańa, jergilikli isbilermenler tárepinen ótkeriliwi keleshekte jáne de kóplegen isbilermenlerdi Yaponiya tájiriybesi tiykarında oqıtıw imkaniyatların sezilerli dárejede arttıradı.

ÓzA
Bank málimleme-xızmeti