Awǵanstan ǵalaba xabar qurallarında usı jıldıń 26-avgust kúni Tashkentte Ózbekstan Sırtqı isler ministrligi tárepinen shólkemlestirilgen Oraylıq Aziya mámleketleriniń Awǵanstan boyınsha arnawlı wákilleriniń birinshi ushırasıwın keńnen jarıtpaqta, dep xabar bermekte “Dunyo” MA.

Sonıń ishinde, “Afghanpaper.com” elektron saytında járiyalanǵan maqalada Tashkenttegi májiliste Qazaqstan, Qırǵızstan, Tájikstan hám Ózbekstan wákilleri Awǵanstandaǵı házirgi jaǵday hám birgeliktegi birge islesiw perspektivaların dodalaǵanı atap ótilgen.
Ushırasıw biyǵárez baylanıs toparı sıpatında shólkemlestirilgeni, onnan gózlengen maqset bolsa Awǵanstannıń imkaniyatları menen mashqalaların úyreniw hám olarǵa regionallıq birge islesiwde sheshim tabıw ekeni atap ótilgen.
“Sóylesiwde qáwipsizlik tarawında birge islesiw zárúrligi, sawda hám tranzit baylanısların tiklew, mádeniy rawajlanıw hám gumanitarlıq jumıs sıyaqlı máseleler dodalandı. Oraylıq Aziya mámleketleriniń wákilleri Awǵanstanda turaqlı tınıshlıqtı támiyinlew boyınsha birgeliktegi strategiyalar islep shıǵıw zárúrligin málim etti”, – dep jazılǵan.

Awǵanstan elektron basılımı, sonday-aq, bul baylanıs toparınıń shólkemlestiriliwi qońsı mámleketlerdiń Awǵanstandaǵı jaǵdaydıń rawajlanıwındaǵı rolin arttırıw hám mámlekettegi turaqsızlıqtıń region ushın aqıbetlerin jumsartıw jolındaǵı jańa qádem bolıwı múmkin ekenligin ayrıqsha atap ótken.

Qaraqalpaqstan xabar agentligi