Ózbekstanda hayal-qızlardı málimleme texnologiyaları tarawına tartıw jolında jáne bir áhmiyetli qádem taslanbaqta.

“GAP Women IT Union” hayal-qızlar IT-klubı”Arzıwdaǵı kásipke jáne bir qádem” atamasında ushırasıw ótkerdi.

Ilaj jas qızlardıń kásiplik rawajlanıwın qollap-quwatlaw, zamanagóy kónlikpelerdi qáliplestiriw hám olardı xalıqaralıq kompaniyalar talaplarına beyimlestiriwge qaratılǵan.
Ilajda Sanlı texnologiyalar ministriniń keńesgóyi Kamola Sobirova hám basqalar hayal-qızlardıń IT tarawındaǵı ornın jáne de arttırıw boyınsha pikir-usınısların bildirdi.
– Biz hayal-qızlardı óz potencialına iseniwge shaqırıw, ishki kúshin júzege shıǵarıw hám IT tarawında turaqlı karera hár bir qız ushın ashıq ekenin ámelde kórsetiwimiz zárúr. Bunday ushırasıwlar olarǵa jetekshi qánigelerden úyreniw hám keleshek rejeleri ushın ilham alıw imkaniyatın jaratadı, – dedi Kamola Sobirova.
Sonday-aq, statistika da buǵan dálil boladı. Eger 2018-jılı joqarı bilimlendiriw mákemelerinde MKT baǵdarlarında shama menen 3 mıń 300 qız bilim alǵan bolsa, 2024-jılǵa kelip olardıń sanı 17 mıń 700 den artqan. Keyingi eki jıl ishinde GAP joybarı pútkil respublika boylap mıńnan aslam qatnasıwshını qamtıp aldı. Olardıń kópshiligi jetekshi kompaniyalarda jumıs basladı yamasa stajirovka ótew imkaniyatına iye boldı.
Ózbekstan xalıqaralıq reytinglerde de óz ornın bekkemlep barmaqta. BMShtıń Elektron húkimet rawajlanıw indeksinde mámleket 87-orınnan 63-orınǵa kóterildi. Global Startup Ecosystem Index reytinginde de turaqlı ósim kórsetildi.
Bunday baslamalar mámlekette IT qánigelerine bolǵan talap artıp atırǵanın hám hayal-qızlardıń tarawǵa jedel tartılıwı strategiyalıq áhmiyetke iye bolıp atırǵanın kórsetedi. Sonıń ushın “GAP Women IT Union” “Sanlı Ózbekstan – 2030” strategiyasın ámelge asırıwda áhmiyetli orın iyeleydi.

Nigora Rahmonova, ÓzA