Múnásibet

Elimiz ǵárezsizlikke eriskenine otız tórt jıl tolıwı múnásibeti menen mámleketimiz boylap bir qatar bayram ilajları ótkerilmekte.
Búgin Tashkent qalasında ótken máresimde hár qıylı tarawlarda jemisli miynet etip kiyatırǵan pidayı watanlaslarımız húrmetli ataqlar, orden hám medallar menen sıylıqlandı.
Ilajda mámleketimiz basshısı barlıq watanlaslarımızdı Ǵárezsizlik bayramı menen qızǵın qutlıqladı. Mámleketimizde qolǵa kirgizilip atırǵan jetiskenlikler hám ámelge asırılıp atırǵan reformalardıń tiykarında xalqımızdıń mártligi, awızbirshiligi hám pidákerlik miyneti jatırǵanın atap ótti.
Máresimnen soń Ózbek Milliy akademiyalıq drama teatrınıń aktyorı Saida Rametova menen sáwbetlesiw imkaniyatına iye boldıq.
– Bárinen burın, elimiz ǵárezsizliginiń quwanıshlı kúnlerinde xalqımızdıń mehiri hám mámleketimizdiń itibarın sezinip, “Ózbekstan Respublikası xalıq artisti” ataǵı menen sıylıqlanǵanımnan sheksiz quwanıshlıman. Bul joqarı itibar tek ǵana ózime emes, al pútkil teatr hám kino tarawına bolǵan húrmet belgisi bolıp esaplanadı.
Keyingi jıllarda kórkem óner hám mádeniyatqa, ásirese, kino tarawına úlken itibar qaratılmaqta. Jańa kinofilmler, teatr saxnalarında jaratılıp atırǵan shıǵarmalar arqalı xalqımızdıń tariyxıy ótmishin, ruwxıy dúnyasın hám zamanagóy turmısın keńnen sáwlelendiriw imkaniyatı payda boldı.
Keyingi jılları milliy kinomız ádewir janlanǵanın tákirarlawdan sharshamayman. Usı tarawdıń wákili sıpatında bul reformalardıń nátiyjesinen maqtanaman. Bunıń ushın mámleketimiz basshısına minnetdarshılıq bildiriwimiz kerek. Biz dóretiwshilerdi kino kórkem ónerin rawajlandırıw ushın jáne neler islewimiz kerek, degen soraw bárqulla qıynap turıwı kerek.
Tariyxımızdı dúnyaǵa tanıtpaqshı bolsaq, xalqımızdıń milliy maqtanıshın kóteriwdi qálesek, kino kórkem ónerin rawajlandırıwımız kerek. Mámleketimiz basshısınıń baslaması menen islep shıǵılǵan “Tiri tariyx” seriyası sheńberindegi filmler joybarı tiykarında izbe-iz kartinalar júzege shıǵarılmaqta. Eń áyyemgi ótmishimizden baslap, jaqın tariyxımızǵa shekemgi oǵada úlken dáwir qamtıp alınbaqta. Jaratılıp atırǵan filmlerdiń teması bolsa keń hám ráńbáreń.
Maǵan berilgen sıylıq pútkil jámáátimizge jáne de juwapkershilik júkleydi. Keleshekte de teatr hám kino saxnasında xalqımızdıń mánawiyatın bayıtıwǵa, jas áwladqa úlgi bolatuǵın qaharman obrazlardı jaratıwǵa háreket etemen. Elimizdiń mádeniyatı hám kino sanaatınıń rawajlanıwına xızmet etiw meniń eń tiykarǵı arzıw-niyetlerimnen biri bolıp qaladı.

ÓzAnıń xabarshısı Ikrom AVVALBOEV jazıp aldı.