Senattıń Byudjet hám ekonomikalıq máseleler komitetiniń májilisinde Energetika ministrliginiń tutınıwshılardı úzliksiz elektr energiyası menen támiyinlew boyınsha ámelge asırıp atırǵan jumıslarınıń jaǵdayı dodalandı.

Mámleketimizde xalıqtıń turaq jayları, óndiris kárxanaları hám sociallıq taraw obektlerin elektr energiyası menen úzliksiz támiyinlew baǵdarında izbe-iz jumıslar alıp barılıp atırǵanı atap ótildi.
Elektr támiynatı tarmaqların modernizaciyalaw, jańa energiya quwatlıqların paydalanıwǵa tapsırıw hám tutınıwshılarǵa elektr energiyasın úzliksiz jetkerip beriw sistemasın jetilistiriw máselelerine ayrıqsha itibar qaratılmaqta.
2024-jılı elektr energiyasın islep shıǵarıw kólemi 2016-jılǵa salıstırǵanda 22,5 milliard kVt saat yamasa 38 procent kóp bolǵan. 2024-jılı tutınıwshılarǵa 2016-jılǵa salıstırǵanda 21,8 milliard kVt saat yamasa 48 procent kóp elektr energiyası jetkerip berilgen.
Sonıń menen birge, 2025-jılı tómen kúshleniwli 4 mıń 530 kilometr uzınlıqtaǵı elektr uzatıw tarmaqların hám 1 mıń 756 transformator punktin jańalaw rejelestirilgen. Ótken dáwir dawamında 5 mıń 829 kilometr uzınlıqtaǵı elektr uzatıw tarmaqları hám 1 mıń 854 transformator punkti jańalanǵan.
Respublikamızda 220-500 kV quwatlılıqqa iye 91 kishi stanciya hám 12,5 mıń km elektr uzatıw tarmaǵınan nátiyjeli paydalanılmaqta.
Sonday-aq, 35-110 kV quwatlılıqtaǵı 1 mıń 851 kishi stanciya hám 278,5 mıń kilometr tarmaq jáne 97,9 mıń transformator punkti arqalı tutınıwshılarǵa elektr energiyası jetkerip beriledi.
2021-2024-jıllarda elektr tarmaqların rawajlandırıw sheńberinde quwatlılıǵı 110-500 kV bolǵan 1 mıń 310 kilometrlik elektr uzatıw tarmaqları qurılıp, joqarı kúshleniwli kishi stanciyalardıń quwatlılıǵı 9 mıń 348 MVAǵa arttırıldı. 38 mıń 51 kilometr elektr jetkerip beriw tarmaqları hám 11 mıń 914 transformator punktiniń jańalanıwı nátiyjesinde 8 mıńnan aslam máhálleniń elektr támiynatı jaqsılanıwına erisilgen.
Dodalaw dawamında senatorlar eki basqıshlı sistemaǵa ótiw, únemli úskene hám quyash panellerin ornatıw jáne tarawdı sanlastırıw baǵdarındaǵı jumıslarǵa da ayrıqsha itibar qarattı.
Májilis juwmaǵında tarawdı jetilistiriwge qaratılǵan qarar qabıl etildi.

N.Abduraimova,
ÓzA