Ukraina armiyası birinshi márte Rossiya áskerleri shıǵıs sanaat orayı esaplanǵan Dnepropetrovsk wálayatı aymaǵına kirgenin tastıyıqladı. Dnepr operativ-strategiyalıq áskerler toparı wákili Viktor Tregubov BBC xabarshısına bergen intervyuinde bılay dedi:

– Bul Dnepropetrovsk wálayatı aymaǵındaǵı birinshi keń kólemli hújim. Biz qolımızdan kelgeninshe olardı toqtatıp atırmız.
Rossiya jaz máwsiminiń basınan bul aymaqqa kirgenin aytıp keledi. Ukraina derekleri bolsa ruslar tek ǵana eki awıl – Zaporoje hám Novogrigorevka shegarasına kirgen bolıwı múmkin ekeni, Bas shtab bul xabardı da biykarlap, urıs dawam etip atırǵanın bildirgeni haqqında jazǵan.
Bizge belgili, Dnepropetrovsk urıstan aldın 3 million xalıq jasaytuǵın, Donbassdan keyin Ukrainanıń eń iri awır sanaat orayı edi. RF bul wálayatqa rásmiy dawagerlik etpese de, aymaqtaǵı iri qalalar, sonıń ishinde Dnepr turaqlı túrde raketa hújimine ushıramaqta.
Qánigelerdiń atap ótiwinshe, Rossiyanıń bul jerge kiriwi Ukrainaǵa ruwxıy jaqtan awır soqqı beriwi múmkin.
Tramp-Putin ushırasıwı waqtında diplomatiyalıq process biraz tómenlegeni de itibarǵa ılayıq. AQSh jetekshisi jaqında Alyaskada rossiyalı kásiplesi menen ushırasıp, keyin ala Vashingtonda Zelenskiy menen sóylesiw ótkerdi. Ol endi eki jetekshini bir dógerekke shaqırmaqta.
Nátiyjede, Rossiya SIM basshısı Sergey Lavrov basqasha bayanat berdi:
– Kún tártibi tayar emes, hesh qanday ushırasıw rejelestirilmegen!
Evropa Awqamınıń sırtqı siyasat basshısı Kaya Kallas aymaqlardı Moskvaǵa beriw boyınsha kelisimdi “qaqpan” dep atadı. Zelenskiy bolsa Batıs awqamlaslarınan urıstan keyingi anıq qáwipsizlik kepilligin talap etpekte. Britaniya Bas ministriniń wákilleri London Ukrainaǵa ásker jiberiwge tayar ekenin bildirip, Patshalıq áskerleri tek ǵana urıstan keyingi tınıshlıqtı saqlawǵa xızmet etetuǵının qosımsha etti. Germaniya kancleri Fridrix Merc bolsa “Zelenskiy sóylesiwge tayar, endi Kremldiń gezegi”, dedi.
Ukraina húkimeti er adamlar ushın belgilengen mobilizaciya sheklewin jumsarttı. Endi 18-22 jastaǵı jigitler mámleketten erkin shıǵıp ketiwi hám mámleketke qaytıp kiriwi múmkin.

Musulmon Ziyo, ÓzA