Ózbekstan bay tariyxıy miyrasqa iye, mádeniyatlar kesilispesinde jaylasqan mámleket sıpatında kóplegen materiallıq hám materiallıq emes miyrasqa iye. Mine, usı tariyxıy baylıqlardı saqlaw, úyreniw hám keleshek áwladlarǵa jetkeriwde muzeyler áhmiyetli rol atqaradı. Sońǵı jılları elimizde muzeylerdiń jumısın bunnan bılay da jetilistiriw, olardıń fondın keńeytiw hám zamanagóy texnologiyalardı engiziw baǵdarında bir qatar sistemalı jumıslar ámelge asırılmaqta.

Milliy statistika komiteti maǵlıwmatlarına bola, 2025-jıl 1-yanvar jaǵdayına respublikamız boyınsha muzeylerdegi tiykarǵı fond eksponatlarınıń sanı 2,7 million danaǵa jetken. Bul kórsetkish 2024-jılǵa salıstırǵanda 129,2 mıń yamasa 5 procentke kóp. Bul ósiw tek ǵana muzeylerdiń materiallıq bazası bekkemlenip atırǵanınan emes, al mádeniy miyrastı saqlaw hám úgit-násiyatlawǵa qaratılǵan mámleketlik siyasattıń nátiyjeliliginen dárek beredi.
Mámleket aymaqları kesiminde esaplanatuǵın bolsa, eń kóp eksponatlar Tashkent qalasındaǵı muzeyler fondında jıynalǵan bolıp, olardıń sanı 1 million 255 mıń 915 danadan asadı. Bul, bir jaǵınan, paytaxtta jaylasqan iri ilimiy hám mádeniy mákemeler, sonday-aq, oraylıq mámleketlik arxivler hám institutlardıń jumısı menen baylanıslı.
Sonday-aq, Samarqand wálayatında 239 mıń 650, Qaraqalpaqstan Respublikasında 197 mıń 506, Surxandárya wálayatında 178 mıń 80, Ferǵana wálayatında 161 mıń 403 hám respublikamızdıń basqa aymaqlarında 703 mıń 411 muzey eksponatları bar. Bul joqarı kórsetkish aymaqlardaǵı tariyxıy estelikler hám arxeologiyalıq esteliklerdiń kópligin sáwlelendiredi. Joqarıdaǵı statistikalıq kórsetkish muzeyler jumısınıń búgingi jaǵdayı, processler hám perspektivalı baǵdarların tereń tallawǵa járdem beredi.

Dildora DWSMATOVA
ÓzA