Senattıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komitetiniń keńeytilgen májilisinde Ózbekstannıń Túrkiya hám Avstriyadaǵı diplomatiyalıq wákilxanaları basshılarınıń esapları tıńlandı.

Bul esabatlarda mámleketleraralıq qatnasıqlardı rawajlandırıw, investiciyalardı tartıw, milliy ónimlerdiń eksportın arttırıw, sırt el turistlerin tartıw, joqarı dárejedegi saparlar sheńberinde qabıl etilgen “jol kartaları”n orınlaw máselelerine itibar qaratılǵan.
Májiliste mámleketimiz basshısı tárepinen sırtqı siyasatımızdıń tiykarǵı maqseti – elimizge sırt el investiciyaların tartıw, milliy ónimlerimizdiń dúnya bazarındaǵı úlesin arttırıw hám Ózbekstannıń xalıqaralıq imidjin bekkemlew belgilep berilgenine jáne bir márte itibar qaratıldı.
Ózbekstannıń Túrkiya hám Avstriyadaǵı diplomatiyalıq wákilxanaları tárepinen 2024-2025-jıllarda sawda-ekonomikalıq, investiciya, eksport, logistika, transport, awıl xojalıǵı, ilim, mádeniyat, turizm hám sırtqı migraciya sıyaqlı áhmiyetli tarawlarda birge islesiw baylanısların bunnan bılay da keńeytiw jáne tiyisli “jol kartaları”nda belgilengen wazıypalardıń orınlanıwın támiyinlew boyınsha ámelge asırılǵan jumıslar hár tárepleme dodalandı.
Atap aytqanda, Prezidentimizdiń basshılıǵında usı jıl 30-iyul kúni miywe-ovoщ hám azıq-awqat ónimleriniń eksportın kóbeytiw, 13-avgust kúni toqımashılıq tarawında eksport imkaniyatları menen rezervlerdi iske qosıw boyınsha videoselektor májilislerinde elshixanalarǵa eksportshı kárxanalarǵa sırt elde bazar tabıw, milliy ónimlerge sertifikat hám ruqsatnamalar alıp beriw, sırt elde sawda úyleri hám qoymaxanalar shólkemlestiriw, sırt el brendlerin alıp keliw hám kárxanalarımızǵa sertifikatlar alıp beriw boyınsha berilgen tapsırmalardıń orınlanıwın támiyinlew zárúr ekenligi atap ótildi.
Bul diplomatiyalıq wákilxanalardıń jumıs nátiyjeliligin arttırıw hám mashqalalardı saplastırıwda olardıń juwapker ministrlikler hám uyımlar, hákimlikler jáne jergilikli keńesler menen turaqlı hám tikkeley baylanısların jolǵa qoyıw zárúr ekenligi ayrıqsha atap ótildi.
Bul mámleketlerde waqtınsha bolıp turǵan Ózbekstan puqaralarına sapalı konsullıq-huqıqıy járdem kórsetiw, sawda úyleri hám jergilikli kompaniyalar menen baylanıslardı jedellestiriw, sonday-aq, ózbekstanlı isbilermenlerge jaqınnan járdem beriw hám mámlekettiń sawda-ekonomikalıq hám investiciyalıq máplerin alǵa qoyıw boyınsha anıq wazıypalar belgilep alındı hám tiyisli usınıslar berildi.
Májiliste tiyisli qarar qabıl etildi.

N.Abduraimova,
ÓzA