Bıyıl 13-avgust kúni Mámleketimiz basshısı tárepinen toqımashılıq tarawında eksport imkaniyatların hám rezervlerdi iske qosıw máseleleri boyınsha bolıp ótken májiliste ózine túser bahası, óndiris hám eksport boyınsha sheshimler islep shıǵıw, “bajıxana aymaǵında qayta islew” rejimi arqalı tayar ónim eksportın 2 esege arttırıw, kooperaciyanı kúsheytip, tómen quwatlılıqta islep atırǵan kárxanalardı salamatlandırıw ilajların kóriw boyınsha tapsırmalar berilgen edi.

Berilgen tapsırmalardan kelip shıǵıp, Qaraqalpaqstan Respublikası Bajıxana basqarması baslıǵınıń orınbasarı O.Maxmadaliev Qanlıkól rayonında jaylasqan toqımashılıq kárxanasında bolıp, “bajıxana aymaǵında qayta islew” rejimin qollanıw arqalı óndiris kólemin arttırıw boyınsha úgit-násiyat hám túsinik jumısların alıp bardı.
Búgingi kúnde bul kárxanada 600 ge shamalas jergilikli turǵınlar turaqlı jumıs ornı menen támiyinlengen. Keyingi 3 jıl dawamında kárxana Túrkiya, Rossiya, Qıtay sıyaqlı mámleketlerge 23 million 3699 mıń AQSh dolları bahasındaǵı 8541 tonna iyirilgen jip ónimin eksport etken.
Ushırasıw dawamında bajıxana juwapkerleri tárepinen kárxana basshısına “bajıxana aymaǵında qayta islew” bajıxana rejiminiń abzallıqları túsindirilip, rejimnen paydalanǵan halda keleshekte kárxananıń eksport potencialın jáne de arttırıw imkaniyatları ámeliy mısallarda kórip shıǵıldı. Toqımashılıq tarawı ushın nızamshılıqta jaratılǵan imkaniyatlar hám jeńillikler haqqında maǵlıwmatlar berildi.

Qaraqalpaqstan xabar agentligi