Rásmiy sapar menen elimizge kelgen Yaponiya sırtqı isler ministri Takeshi Ivaya basshılıǵındaǵı delegaciya 26-avgust kúni Samarqand qalasında boldı.

Miymanlardı Samarqand xalıqaralıq aeroportında Ózbekstan sırtqı isler ministriniń orınbasarı B.Usmonov hám Samarqand wálayatı hákimliginiń juwapkerleri kútip aldı.

Yaponiyalı diplomat dáslep “SamAvto” zavodında bolıp, óndiris processleri menen tanıstı. Bul kárxanada 2007-jıldan berli “ISUZU Motors Ltd” kompaniyası hám “Itochu”korporaciyası menen birgelikte “ISUZU” shassisi tiykarında avtobuslar hám júk mashinaları, arnawlı texnikalar islep shıǵarılmaqta. Zamanagóy, xalıqaralıq standartlarǵa juwap beretuǵın bul texnika quralları ishki bazar menen birge sırt elge eksport etiledi.

Bunnan soń delegaciya Samarqand rayonındaǵı “Bobur agro innovaciya” fermer xojalıǵında boldı. Bul jerde Yaponiya xalıqaralıq birge islesiw agentligi (JICA) járdeminde usı mámleketten alıp kelingen alma sortları tárbiyalanbaqta.

Takeshi Ivaya fermer menen sáwbetlesiw waqtında xojalıqta alma hám júzim jetistiriwdiń ózine tán tárepleri, qollanılıp atırǵan innovaciyalıq usıllar menen qızıqtı. Jergilikli hám sırt elden alıp kelingen alma sortlarınıń hawa-rayı sharayatına beyimlesiwsheńligi hám keselliklerge shıdamlılıǵı, sapası, satıp alıwǵa qolaylılıǵına itibar qaratıldı.

Yaponiya sırtqı isler ministri Samarqandtaǵı tariyxıy-mádeniy esteliklerde de bolıp, xalqımızdıń bay tariyxı hám mádeniyatı, ata-babalarımızdıń dóretiwshilik potencialı haqqında maǵlıwmatlarǵa iye boldı.

Ǵolib HASANOV, ÓzAnıń xabarshısı