Keyingi jılları pútkil dúnyada jasalma intellekt texnologiyaları barlıq tarawlarda jedel engizilmekte. Ásirese, neft-gaz tarmaǵı sıyaqlı qıyın hám qáwipli tarawlarda óndiris nátiyjeliligin arttırıw, qáwipsizlikti támiyinlew hám processlerdi optimallastırıwda bul texnologiyalar úlken áhmiyetke iye.

Mámleketimizde de bul baǵdarda izbe-iz jumıslar ámelge asırılmaqta. “Ózbekneftgaz” AJ málimleme xızmetiniń basshısı Mwmin Ibodovtıń atap ótkenindey, bul shólkemde global sanlastırıw tendenciyalarına sáykes túrde jumıs alıp barılmaqta.
– Kánlerde alıp barılıp atırǵan izlew jumıslarında geologiyalıq, geofizikalıq hám gidrodinamikalıq maǵlıwmatlardı tallaw ushın zamanagóy sheshimler engizilmekte, – dedi M.Ibodov. – Máselen, “Pipesim” qatlam sistemaları modelleri, “ProSource” maǵlıwmatlar bazası hám E-KON platforması menen integraciyalanǵan “Generative AI chat-bot” islep shıǵıldı.
Bul sistema qánigelerge operativ hám anıq analitikalıq juwmaqlar tayarlaw imkaniyatın jaratadı. Xızmetkerlerdiń kúndelikli jumısın jeńilletiw hám nátiyjeliligin arttırıw maqsetinde “Microsoft 365” programmalıq támiynatı ushın licenziyalar satıp alınǵan. Bunıń nátiyjesinde olar maǵlıwmattı qayta islew, wazıypalardı orınlaw hám “Microsoft Copilot” xızmetlerinen paydalanıw imkaniyatına iye boldı.
Jámáátlik jumıs processlerin jáne de nátiyjeli shólkemlestiriw boyınsha dáslep “ChatGPT Team” keyin ala bolsa “ChatGPT Enterprise” platformasın engiziw rejelestirilgen. Házirgi waqıtta biz neft hám gazdi qazıp shıǵarıw jáne qayta islew processlerin basqarıwda “Primavera P6 EPPM” sistemasına tolıq ótip atırmız. Bul sistema tiykarında joybarlar ústinen birden-bir qadaǵalaw ornatıw, qárejetlerdi anıq esapqa alıw hám CIC + AI Analytics + Primavera sıyaqlı imkaniyatlar menen qáwip-qáterlerdi aldınnan basqarıw múmkin. Sonıń menen birge, qurılıs maydanlarındaǵı maǵlıwmatlar real waqıt rejiminde tallanıp, jumıslardıń barısı avtomat túrde bahalanadı. Bul keshigiwlerdi azaytıp, basqarıw qararların jasalma intellekt tiykarında qabıl etiw procesin jetilistiredi.
Sonday-aq, óndiris obektleriniń sanlı egizeklerin jaratıw hám jasalma intellekt analizi tiykarında processlerdi optimallastırıw máseleleri de úyrenilmekte. Bul qáwip-qáterlerdi aldınnan anıqlaw hám jumıs ónimdarlıǵın arttırıwda áhmiyetli.
Áhmiyetlisi, biz xızmetkerlerimizdiń sanlı texnologiyalar hám jasalma intellekt sheshimlerinen nátiyjeli paydalanıwı ushın oqıw kursların shólkemlestirip atırmız. Bul olardıń mamanlıǵın zaman talaplarına sáykes túrde rawajlandırıw imkaniyatın beredi.

N.Ziyodullaeva, ÓzA