Elimizde jeke menshik sektordı rawajlandırıw, xalıqtıń bántligin támiyinlew hám ekonomikalıq belsendilikti arttırıwǵa qaratılǵan ámeliy ilajlar óz nátiyjesin bermekte.

Bul baǵdarda jaratılıp atırǵan imkaniyatlardan aqılǵa uǵras paydalanıp, óz jumısın kishi ustaxanadan baslap, búgin zamanagóy óndiris kárxanasına tiykar salıp atırǵan isbilermenlerdiń sanı artıp barmaqta. Olardıń arasında “Amu metall-kovka art” JShJ basshısı Jasurbek Bobojonovtıń jumısı itibarǵa ılayıq úlgi sıpatında atap ótilmekte.
Búgingi kúnde bul jeke menshik kárxana tek ǵana jergilikli bazarda emes, al pútkil aymaqta talap joqarı bolǵan “Amu teplo” ısıtıw qazanların islep shıǵarıwdı jolǵa qoyǵan. Bul úskeneler óziniń energiyanı únemlewshiligi, isenimliligi hám nátiyjeliligi menen ajıralıp turadı. Atap aytqanda, bir shańaraqtı yamasa ıssıxananı tek ǵana 30-50 kg kómir menen bir sutka dawamında ısıtıw múmkin.
Kárxananıń jumısı temir esik hám dárwazalar, milliy usıldaǵı dekorativ buyımlardı islep shıǵarıwdı da qamtıp alǵan. Házirgi waqıtta kárxanada 10 turaqlı xızmetker, bir neshe máwsimlik jumısshı hám bir topar shákirtler miynet etpekte.
Jasurbek Bobojonov óz jumısın ápiwayı ustaxanada, ákesiniń qasında jumısshı sıpatında baslaǵan. Búgin bolsa ol zamanagóy texnologiyalarǵa tiykarlanǵan, básekige shıdamlı ónimler islep shıǵaratuǵın kárxana basshısı sıpatında tanılmaqta. Onıń baslaması sebepli tek ǵana óziniń shańaraǵı emes, al máhálleniń sociallıq-ekonomikalıq rawajlanıwına úlken úles qosılmaqta.
Ámelge asırılıp atırǵan bunday joybarlardan belgili bolǵanınday, tınımsız miynet hám izleniw sebepli hátteki, shetki aymaqlarda da ekonomikalıq ósiwge erisiw múmkin. Jasurbek Bobojonovtıń ibratlı jumısı bolsa, álbette, basqa isbilermenler ushın da ilham dáregi bolıp xızmet etedi.

Qaraqalpaqstan xabar agentligi