Búgingi sanlı ásirde sociallıq tarmaqlar, ásirese, instagram, tek ǵana kewilashar platforma emes, al hár bir kásip iyesi ushın ózin kórsetiw, jeke brend jaratıw hám qarıydarlar bazasın keńeytiw imkaniyatına aylanǵan. Shıpakerler, aspazlar, stilistler, bort baqlawshıları, sportshılar, aktyorlar, dizaynerler hám basqa da kóplegen kásip iyeleri óz baǵdarları boyınsha bloglar júrgiziw arqalı úlken auditoriyaǵa iye bolmaqta.

Instagramda professional kózqaras penen kontent jaratıw hám turaqlı jumıs alıp barıw adamǵa bir qansha abzallıqlar beredi. Mısal ushın: qánige óziniń jumıs tájiriybesi, kózqarası arqalı basqalardan ajıralıp tura aladı. Kóbirek qarıydar hám auditoriya tartıw menen turaqlı kontentke qızıqqan auditoriya qáliplesedi. Qalaberdi, qanaatlanǵan qarıydarlardıń qánige jumısına maqtawı hám jaqsı pikirleri menen basqa qarıydarlarda da unamlı tásir payda boladı.
Sonıń menen birge, instagramda aldaw hám ótirik jaǵdaylar da baqlanbaqta. Kópshilik jaǵdaylarda professional emes shaxslar basqa qánigelerdiń jumısların ózine tiyisli dep járiyalaydı. Negizinde bolsa olar onshelli jetik kásiplik bilimge iye emes. Ayırım blogerler qáwenderlik postları arqalı sapasız ónim yamasa xızmetlerdi úgit-násiyatlamaqta. Qalaberdi, qánigelik sertifikatısız jumıs alıp barıw da júdá kóbeygen. Bul ásirese medicina, kosmetologiya hám psixologiya sıyaqlı názik tarawlarda qáwipli bolıwı múmkin. Bunnan tısqarı, jazılıwshılar sanın jasalma kóbeytiw hám kóriwler sanın jasırıw sebepli blog iyesi jumısı haqıyqattan da qánigeli ekenin tekseriw biraz qıyın.
Bunday jaǵdaylar tek ǵana paydalanıwshılardı aldap qoymastan, al haqıyqıy qánigelerdiń isenimine zıyan keltiredi. Sol sebepli, sociallıq tarmaqlarda, ásirese, professional jumıs alıp barıp atırǵan shaxslar ushın, belgili bir ádep-ikramlılıq hám sociallıq “filtr” zárúrligi tuwılmaqta.
Payda bolıp atırǵan jaǵday sebepli, diplom, status hám jumıs tájiriybesi bir shette qalıp, bir bloger reklaması yamasa insannıń arnawlı psixologiyalıq shaqırıqları arqalı ózine tartatuǵın jalǵan “qánigeler”ge talap kúnnen-kúnge artıp barmaqta. Kosmetolog preparatların dozasınan artıq paydalanǵanı ushın qarıydarda aldın alıp bolmaytuǵın teri kúyiw asqınıwların keltirip shıǵarsa, asqazan operaciyasın arnawlı bilim hám kónlikpelersiz ótkergennen soń nawqastıń densawlıǵı awırlassa, insan haqıyqıy qánigeni qalay tabıw múmkin ekenligine de gúmanlanadı…
Bul jaǵdaylardıń aldın alıw ushın Instagram platformasında professional akkauntlar ushın óz aldına klassifikaciyalar, tastıyıqlaw mexanizmleri kúsheytiliwi múmkin. Jalǵan kontent yamasa jalǵan maǵlıwmat tarqatatuǵın akkauntlar haqqında paydalanıwshılar xabar beriwi múmkin bolǵan ashıq sistemalar jáne de qolaylastırılıwı kerek. Sonıń menen birge, ǵalaba xabar quralları, bilimlendiriw mákemeleri hám juwapker shólkemler tárepinen málimleme mádeniyatı boyınsha maǵlıwmatlar berip barılıwı áhmiyetli.
Instagram búgin hár bir insan ushın jańa esiklerdi ashpaqta. Biraq bul imkaniyatlar menen birge juwapkershilik te artpaqta. Hár bir qánige óz tarawında hadal, ashıq-aydın hám ádep-ikramlılıq normalarına súyenip jumıs islese, sociallıq tarmaqlar salamat báseki maydanına aylanadı. Sonlıqtan, tek ǵana platformalar dárejesinde emes, al jámiyet dárejesinde de málimleme maydanın salamatlandırıw ushın ruwxıy hám texnikalıq “filtrler”di engiziw áhmiyetli bolıp barmaqta.

Dildora DWSMATOVA, ÓzAnıń xabarshısı