“Turkmenportal” basılımında “Ózbekstan Túrkmenstan hám Qazaqstannıń qatnasıwında turistlik sheńber jaratıwdı usınıs etpekte” atamasında maqala járiyalandı.

– Ózbekstan bir waqıttıń ózinde regionnıń bir neshe mámleketine barıw tileginde bolǵan sırt elli turistlerdi tartıw ushın Oraylıq Aziyanıń úsh mámleketin birlestiretuǵın jańa turistlik aylanba jaratıwdı usınıs etti,-delinedi maqalada. – Ózbekstan Respublikası Prezidentiniń “2025-2026-jıllarda turistler aǵımın keskin kóbeytiw hám turistlik xızmet kólemin jedel keńeytiw arqalı turizmniń ekonomikadaǵı ornı hám áhmiyetin arttırıw ilajları haqqında”ǵı Pármanında transshegaralıq birgeliktegi turistlik marshrutlardı keńeytiw maqsetinde “Túrkmenstan – Xorezm – Qaraqalpaqstan – Qazaqstan” jónelisinde turistlik koridor-aylanba jol jaratıw belgilengen.
Házirgi waqıtta Túrkmenstan hám Qazaqstannıń turizm departamenti hám kompaniyaları menen birgelikte bul baslama islep shıǵılmaqta.
Baǵdarlar tarmaǵına YuNESKO Dúnya júzilik miyrası obektleri statusına iye 16 jáne milliy hám regionallıq áhmiyetke iye obektler kiredi.
Túrkmenstannıń Áyyemgi Marı qalası, “Dárwaza” gaz krateri, Góne Úrgensh mánzilleri, Xorezmdegi Iyshan qala, Diyshan qala, Qaraqalpaqstandaǵı I.V.Savickiy muzeyi, Qızıl qala, Shılpıq qala, Topıraq qala, Ayaz qala, Sultan Uayıs baba zıyarat etiw ornı, Qazaqstannıń Tarısh oypatlıǵı, Bozjıra oypatlıǵı, Shaqpaq ata maqbarası, Sherqala tawı usılardıń qatarına kiredi.
Bul aylanba jol tek ǵana sayaxat ıqlasbentleri emes, al mádeniyat, tariyx, kórkem óner hám tábiyattı súyetuǵınlar ushın da haqıyqıy ashıqlıq bolıwı múmkin.
Bul aymaqlar rawajlanǵan etnoturizm sisteması, ónermentshilik, gastronomiyalıq dástúr hám hár qıylı tábiyǵıy landshaft – shól hám dalańlıqtan baslap taw dizbegi hám dáryalar sıpatında belgili.
Turistler hám turistlik shólkemlerge usı jónelis boyınsha óz betinshe yamasa turistlik toparlar quramında biytákirar waqıyaǵa bay sayaxat shólkemlestiriw usınıs etiledi.

Muharrama Pirmatova, ÓzA