Ózbekstan Respublikası Prezidentiniń q a r a r ı

Ózbekstannıń dúnya mádeniy kartasındaǵı abırayın arttırıw, zamanagóy kórkem óner, tariyxıy miyras, kreativ ekonomika hám turizmniń úylesimliligin támiyinlew arqalı mámlekettiń sociallıq-ekonomikalıq rawajlanıwına úles qosıw, sonday-aq, YuNESKOnıń Dúnya júzilik miyrası dizimine hám “Dóretiwshi qalalar tarmaǵı” baǵdarlamasına kirgen, ásirler dawamında ilim, arxitektura, ónermentshilik hám kórkem óner orayı bolıp kiyatırǵan eski Buxara qalasınıń ornı hám áhmiyetin bunnan bılay da arttırıw maqsetinde qarar etemen:
1. 2025-jıldan baslap hár eki jılda bir márte sentyabr-noyabr aylarında Buxara qalasında xalıqaralıq zamanagóy kórkem óner biennalesi (keyingi orınlarda – Biennale) ótkerip barılsın.
Birinshi Biennale 2025-jıl 5-sentyabr – 20-noyabr kúnleri joqarı dárejede ótkerilsin.
3. Tómendegiler Biennaleniń tiykarǵı maqsetleri etip belgilensin:
a) mámleketimizde zamanagóy hám ámeliy kórkem óner, ónermentshilikti qollap-quwatlaw hám global mádeniy mákanǵa integraciyalaw;
b) kreativ industriyada bilimlendiriw, izertlew hám kásiplik sheberlikti rawajlandırıw, elimiz wákilleriniń dúnyaǵa belgili usta-dóretiwshiler menen birge islesiwin jolǵa qoyıw arqalı xalıqaralıq dárejege alıp shıǵıw;
v) elimizdiń turistlik tartımlılıǵın arttırıw, mádeniy miyras obektlerin kórkem óner kórgizbesi maydanlarına aylandırıw, turaqlı túrde qaytadan barıwǵa bolǵan qızıǵıwshılıqtı qáliplestiriw.
Xalıqaralıq zamanagóy kórkem óner biennalesine tayarlıq kóriw hám onı ótkeriw boyınsha shólkemlestiriw komiteti (keyingi orınlarda – Shólkemlestiriw komiteti) dúzilsin, sonday-aq, onıń quramı hám tiykarǵı wazıypaları 1- hám 2-qosımshalarǵa muwapıq tastıyıqlansın.
Mádeniyat hám kórkem ónerdi rawajlandırıw qorı (keyingi orınlarda – Qor) Shólkemlestiriw komitetin jumısshı uyımı esaplanatuǵını belgilensin.
6. Birinshi Biennale sheńberinde tómendegiler ámelge asırılatuǵını belgilensin:
a) Biennale ótkeriletuǵın 14 mádeniy miyras obektin kórgizbe hám ilajlar, bilimlendiriw hám izertlew, dóretiwshilik hám óndiris processleri úylesken kreativ klasterge aylandırıw;
b) dúnyaǵa belgili usta-dóretiwshiler tárepinen 60 tan aslam art-obekt, sonıń ishinde, installyaciyalardı jaratıw, olardan Biennale ótkeriletuǵın orındı kórkemlep bezewde paydalanıw hám olardıń eń múnásiplerin dúnya boylap kórgizbelerde kórsetiw;
v) dúnyaǵa belgili dóretiwshi, qánige hám aspazlardıń qatnasıwında keń jámiyetshilik ushın 10 háptelik ilimiy-aǵartıwshılıq, mádeniy-kewilashar, turistlik hám gastronomiyalıq baǵdarlamalardı shólkemlestiriw;
g) birinshi Biennaleniń arnawlı katalogi hám ózbek milliy taǵamları receptler kitap-albomın basıp shıǵarıw, olardan xalıqaralıq kólemdegi úgit-násiyatlaw quralı hám sawǵalar toplamı sıpatında keńnen paydalanıw;
d) Buxara Biennalesi haqqında hújjetli film jaratıw, sonday-aq, onnan paydalanıp mámleketimizdiń turistlik potencialın úgit-násiyatlaw;
j) arnawlı bilimlendiriw baǵdarlaması tiykarında xalıqaralıq dárejedegi kuratorlardı tayarlaw hám olardıń dúnyanıń jetekshi kórkem óner maydanlarında Ózbekstannıń atınan qatnasıwın támiyinlew;
z) 30 dan aslam xalıqaralıq ekspert, kurator hám kórkem ónertanıwshılardıń qatnasıwında xalıqaralıq akademiyalıq simpoziumdı ótkeriw.
7. Tómendegiler:
a) Xalıqaralıq zamanagóy kórkem óner biennalesi ótkeriletuǵın materiallıq mádeniy miyras obektleriniń (keyingi orınlarda – Biennale obektleri) dizimi 3-qosımshaǵa muwapıq;
b) Xalıqaralıq zamanagóy kórkem óner biennalesine tayarlıq kóriw hám onı ótkeriwge baylanıslı qárejetlerdi qarjılandırıw dárekleri 4-qosımshaǵa muwapıq tastıyıqlansın.
8. Biennale obektlerinde:
a) joybarlastırıw hám saqlawǵa baylanıslı jumıslar boyınsha Mádeniy miyras agentligi buyırtpashı esaplanadı;
b) sırt elli belgili qánigeler menen birgelikte óz aldına koncepciya hám dizayn tiykarında obektlerdi kórkem jaqtılandırıw hám saqlawǵa baylanıslı jumıslardı shólkemlestiriw, infrastrukturaların jaqsılaw, sonday-aq, Súwretlew kórkem óneri muzeyiniń jańa ekspoziciyasın jaratıw ilajları kóriledi;
Biennale sheńberinde 2025-jıl 31-dekabrge shekem Qor hám Mádeniy miyras agentligi tárepinen qáliplestiriletuǵın dizimler tiykarında hám olar belgilegen subektler tárepinen import etiletuǵın texnika, úskene, ásbap-úskene, kórkem óner dóretpeleri hám olardıń bólekleri, buyımlar hám basqa da tovarlar bajıxana bajısınan azat etiletuǵını belgilensin.
Ministrler Kabineti úsh kún múddette birinshi Biennaleǵa tayarlıq kóriw hám onı ótkeriw boyınsha ilajlar rejesi, qarjılandırıw dáreklerin kórsetken halda qárejetler smetasın tastıyıqlasın.
11. Ózbekstan Respublikası Prezidentiniń ayırım qararlarına 5-qosımshaǵa muwapıq ózgerisler hám qosımsha kirgizilsin.
Usı qarardıń orınlanıwın nátiyjeli shólkemlestiriwge juwapker hám jeke juwapker etip Mádeniyat hám kórkem ónerdi rawajlandırıw qorınıń baslıǵı G.O.Umerova hám Buxara wálayatınıń hákimi B.K.Zaripov belgilensin.
Qarardıń orınlanıwın dodalap barıw, orınlaw ushın juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası
Prezidenti Sh.MIRZIYoEV
Tashkent qalası,
2025-jıl 21- avgust